Porosia e Berishës për krerët e degëve të Rithemelimit: Organizohuni për protesta dhe revolta para dhe pas 11 shkurtit! Largimi i Ramës, i domosdoshëm

Ish kryeministri Sali Berisha ka vënë sërish theksin tek protesta e paralajmëruar për t’u mbajtur në 11 shkurt. Në një takim me krerët e degëve të Rithemelimit në vend, ai u kërkoi që të nisin takimet me qytetarët që të nesërmen për të mbledhur në shesh sa më shumë njerëz.

Ai tha se do të ketë protesta dhe revolta të vazhdueshme deri në largimin e kryeministrit Edi Rama të cilin e akuzoi sërish për korruptimin e ish shefit të kundërzbulimit në FBI, McGonigal. Sa i përket aksionit të opozitës, kreu i Rithemelimit tha se do të kishte një bashkërendim të protestës së 11 shkurtit me qëllim rrëzimin e qeverisë Rama dhe përgatitjeve për fitoren e zgjedhjeve lokale të 14 majit.

“Prova e demokratëve, është mision, përmbushja e të cilit është shpëtimi i Shqipërisë. Çdo ditë që Rama qëndron në pushtet është barrë dhe turp për çdo shqiptar. PD si forcë e vokacionit perëndimor, do ngrihet në këmbë e tëra deri në largimin e tij nga pushteti. Ne në takime të tjera, kemi diskutuar së bashku dhe kemi përcaktuar si mission largimin e Edi Ramës për rikthimin e votës shqiptare.

LEXO EDHE:
Turi i takimeve me Diasporën, Rama zbulon katër vendet e para që do vizitojë

Ne kemi thirrur protestën në datën 11 dhe hymë në një fazë përfundimtare të largimit të Ramës nga pushteti. Koha thërret popullin opozitar të gjendet në orën e tij, ora më e rëndësishme në misionin tonë. Ne nuk shmangemi, përkundrazi, bashkërendojmë dhe bëjmë çdo përpjekje për 14 majin si një ditë fitoreje për kandidatët tanë. Në pamje të parë është komplekse por misioni i kërkon të gjitha këto, kërkon që ne të bëjmë të gjitha përpjekjet për një sukses të vërtetë të PD-së në 14 maj, për largimin e Ramës dhe votën e lirë të shqiptarëve”- u shpreh Berisha.

Përsa i përket zgjedhjeve lokale, Berisha tha se po bëhej një përpjekje nga kryeministri Edi Rama për të përjashtuar PD-në nga zgjedhjet duke përdorur sipas tij, Alibeajn.

"Edi Rama urdhëron të mos regjistrohet nga kancelari vendimi i gjykatës dhe në kundërshtim flagrant me çdo parim, shpall palë Alibashën, pa qenë palë. Çfarë jemi këtu, në këtë situatë, jemi në një përpjekje primitive hakmarrëse për të përjashtuar PD-në nga zgjedhjet. PD do të futet në zgjedhje dhe do të futet vetëm me vulën, logon dhe flamurin e saj. Absolutisht kurrë nuk do të pranojmë të na lejë njeri, të na përjashtojë nga zgjedhjet"-shtoi ish kryeministri.

Në mbyllje të mbledhjes, Berisha tha se protesta e 11 shkurtit do të jetë më e madhja që është parë ndonjëherë në historinë e vendit dhe shtoi se do të kishte edhe mosbindje civile deri në largimin e Ramës nga pushteti.

Rendit zhvillimet sipas orarit:

Të Fundit Të Parat

B.V/Shqiptarja.com

TAG:
• edi rama
• Rithemelimi
• sali berisha