Berisha mbledh Qeverinë:
Kemi ulur vdekshmërinë

TIRANE – Vdekshmëria ndër shqiptarët është ulur gjatë dy dekadave të fundit dhe ky trend ka njohur një përshpejtim sidomos në 10-vjeçarin e fundit. Pretendimi vjen nga vetë Kryeministri Sali Berisha i cili i dedikoi luftës ndaj vdekjes fjalën e tij në mbledhjen e sotme të qeverisë. Berisha tha se shqiptarët kanë “fatin të kenë vdekshmërinë totale për burrat dhe gratë më të ultën se të gjitha vendet e tjera ish-komuniste”.

Sipas kryeministrit, në Shqipëri vdesin 126 burra për 100 mijë banorë, vetëm dy më shumë se në Finlandë ku vdekshmëria ndër meshkujt është në nivel 124/100 mijë banorë. “Ky tregues e rendit Shqipërinë në grupin e vendeve të zhvilluara”, tha kreu i qeverisë dhe është një dëshmi “e rritjes së jetëgjatësisë së shqiptarëve”.

Berisha deklaroi se “ne kemi nivelet më të larta në botë të imunizimit, 98%, të fëmijëve. Në këtë proces qëndron dhe një nga shkaqet e uljes së ndjeshme të mortalitetit foshnjor.” Sipas Kryeministrit, ndër të gjithë treguesit, “asgjë nuk shpreh shkallën e zhvillimit ekonomik dhe social më shumë se vdekshmëria foshnjore”. Ai kujtoi në mbledhjen e qeverisë se dikur “Shqipëria për fatin e keq të saj ka pasur nivele afrikane” ndërsa “Shqipëria e sotme ka një mortalitet infantil një shifror, arritje kjo historike për këtë komb që e rendit Shqipërinë në grupin e vendeve të zhvilluara”.

Kryeministri pohoi se vdekshmëria te foshnjat në vendin tonë është në nivel 8/1000 dhe kërkoi që të zbulohen shkaqet e këtyre vdekjeve për të shpëtuar sa më shumë jetë njerëzish.

Ai më pas foli për nënat në lindje duke pohuar se “ne i përkasim atij grupi vendesh me lejen më të gjatë të lindjes, me një përkujdesje serioze, familjare e shoqërore” për gratë shtatzëna. Në vendin tonë “në tërësi lindjet ndodhin në shtëpitë e lindjes. Lindje të paasistuara në Shqipëri nuk ekzistojnë”, tha Berisha i cili risolli në memorie një ngjarje të para dy viteve kur “në një fshat të zonës së përmbytur të nën Shkodrës, një ekip i spitalit të Lezhës, asistoi në lindje, duke udhëtuar me varkë e në errësirë të plotë”. 

(im/shqiptarja.com)