Berisha: Po nxjerr kandidatë kundër meje për hir të Ramës, Lul Brava i përfshirë në aferën e Portit të Durrësit! Në selinë blu do ndërtohen 4 kulla! Pse Yuri Kim nuk thotë asnjë fjalë kundër qeverisë

Ish-kryeministri Sali Berisha, është ndalur këtë të dielë në Vaun e Dejës për 'Foltoren' e radhës me demokratët. Berisha hodhi akuza ndaj Lulzim Bashës duke thënë se ai ka degraduar pasi u mor peng nga Edi Rama me afera korruptive. Ai theksoi se në selinë e PD është parashikuar të ndërtohen katër kulla hajdutësh ku do të marrë pjesë dhe kreu i PD. Sakaq, Berisha tha se Porti i Durrësit është një nga aferat më të mëdha të shekullit ku është i përfshirë edhe Lulzim Basha.

"Edi Rama arriti ta marrë peng me afera korruptive Lulzim Bashën. 800 mijë metra katror në Portin e Durrësit. Afera e shekullit, ja dhanë gjoja një arabi i cili në një aspekt është biznesmen i madh shumë, por në aspektin tjetër, po kaq i madh si mashtrues.  Ai ka marrë buzën e Savës në Beograd, për të investuar 4 miliardë euro, por deri tani pas 10 vitesh ka investuar 24 mln euro. Portin e Durrësit e ka marrë Edi Rama dhe Lulzim Brava. E rezulton se përfaqësues i Emar në Shqipëri, është menaxheri i kompanisë së i Lulzim Bravës. Ju e patë se çfarë bëri me selitë. Se në çmënyrë armiqësore u soll ai me demokratët që e kanë ndjekur 8 vite. Selia e PD është parashikuar të shndërrohet në kullat e parkut  të katër hajdutëve. Do ndërtohen katër kulla, gjejeni se sa ka marrë për vete Lulzim Brava."-tha Berisha.

Por Berisha nuk la pa ‘sulmuar’ edhe ambasadoren e SHBA, Yuri Kim. Ish-kryeministri deklaroi se ambasadorja nuk thotë asnjë fjalë kundër aferave korruptive të qeverisë dhe Edi Ramës ndërsa shtoi se ajo vijon të heshtë teksa Shqipëria po mbushet me drogë dhe shqiptarët po largohen nga vendi.

"Si ka mundësi që Shqipëria u mbush me drogë dhe nuk e thatë një fjalë kundër qeverisë. Kur drejtësia italiane solli dosjet e trafikantëve ministra i krahasuat këto dosje me dosje të thjeshta. Si ka mundësia që nga Shqipëria ikën investitorë të mëdhenj të huaj dhe nuk thoni një fjalë. Si ka mundësi që ikin qytetarët nga vendi dhe nuk thoni një fjalë kundër Edi Ramës. Si ka mundësi që vazhdoni të reklamoni reformën e dështuar në drejtësi. Si ka mundësi që një njeri që kalon nga afera në aferë. Ne jemi miq të SHBA. Kjo që po bëjmë ne sot është praktikë strikte e amerikanëve. Do bëjmë gjithçka të afrohemi me atë vend. SHBA na kanë ndihmuar në luftën kundër korrupsionit. Qeverisja e përparme ia doli të dyfishojë rroga dhe pensione duke luftuar korrupsionin. Kjo zonjë nuk thotë një fjalë për korrupsionin e qeverisë, por vetëm për ish-zyrtarë. Shikoni çfarë bëhet me FSHF. Kanë votime ata. Përdoret tritoli, përdoren tatimorët kundër një njeriu që nuk e mundin dot me votë. Ky është standardi. A thuhet një fjalë për blindimin e selisë së PD? A keni dëgjuar një fjalë? Asnjë. Këto janë parime të George Soros. Do të qëndrojmë në të drejtën tonë sepse pamë me sytë tanë si vota e lirë u përzu nga Shqipëria. Natën e 25 prillit zonja uroi kreun e KQZ për zgjedhjet më të këqija në historinë e Shqipërisë" - tha Berisha.

Teksa ditën e sotme e quajti të rëndësishme për PD-në, deklaroi se në 6 bashkitë, Durrës, Shkodër, Peshkopi, Lushnjë, Rrogozhinë dhe Vorë, anëtarët e PD votojnë dhe zgjedhin kandidatin për të garuar në zgjedhjet e pjesshme të 6 marsit. Berisha tha se primaret janë metoda më demokratike e zgjedhjes së përfaqësuesve të qytetarëve ndërsa shtoi se qytetarët së shpejti do zgjedhin edhe kryeministrin e tyre. Sakaq, ish-kryeministri tha se Basha po nxjerr kandidatë kundra tij për hir të Edi Ramës.

“Do zgjidhni jo vetëm kryetarët e bashkive, por këshilltarët, deputetët tuaj, por në një të ardhme të afërt do zgjidhni edhe kryeministrin tuaj. Merr fund praktika korruptive dhe autoritare, praktika e emërimeve nga lart, e zarfeve dhe pakove me euro për të fituar emërimin. Emërimi do jetë atribut i vullnetit tuaj të lirë për çdo zyrtar që ju përfaqëson ju. Ai thotë edhe aq pak vota sa tu marrë, e nxit Edi Rama. Me 61 bashki nuk hyri në zgjedhje, me 6 hyn. Atëherë dhe sot është Edi Rama në pushtet. U ndala këtu thjesht për të sjellë në vëmendjen e të gjithë demokratëve mos të mashtrohen nga kallp opozita. Mos të mashtrohen nga ai njeri që nuk ka asnjë parim. Të votojnë në këto 6 bashki Partinë Demokratike, opozitën e vërtetë shqiptare.”-tha Berisha.

Akuzat ndaj Lulzim Bashës nuk munguan, ku Berisha tha se ‘Lul Brava’ degradoi në atë shkallë sa para kamerave të televizioneve i tha shqiptarëve se aty ku ishin 1958 karrige janë të ulur 5004 delegatë dhe 5004 vota, duke ju referuar Kuvendit të kreut të PD më 18 dhjetor.

“Primaret rikthejnë te anëtarësia votën e lirë. Rikthen dinjitetin e tyre. Njeriu që nuk voton i lirë, ka dinjitetin të shkelmuar dhe ju këtë nuk e meritoni kurrë. Njeriu që nuk voton i lirë, ndërgjegjen e tij e ka të lënduar sepse i detyrohet, imponohet të besojë apo të pranojë ato që i dikton bosi i tij tashmë i larguar nga vlerat e lirisë. Së fundmi, kurrë Partia Demokratike nuk do respektonte votën e lirë të shqiptarëve nëse nuk respekton votën e lirë të anëtarëve të saj. PD nuk do ishte një forcë demokratike nëse nuk respekton këtë votë të lirë. E konsideroj një arritje shumë të madhe, të cilën ju garantoj se e kemi në hapat e para. Ky proces na u imponua me emergjencë kohore, sepse në primaret e tjera për deputetë, kryetar bashkie, këshilltar, nuk do votojnë vetëm anëtarët e PD, por të gjithë votuesit e saj.”-tha Berisha.

Presidenti Ilir Meta dekretoi 6 marsin si datën për mbajtjen e zgjedhjeve të pjesshme lokale në 6 bashki, përkatësisht në Durrës, Shkodër, Rrogozhinë, Lushnje, Vorë dhe Dibër ndërsa Komisioni i Rithemelimit ka nisur ditën e sotme primaret në të gjashta bashkitë, ku anëtarët e degëve do të votojnë për kandidatin e preferuar. Votimi ka nisur që në orën 08:00 në 9 Qendrat e Votimit, në 6 bashkitë ku do të mbahen zgjedhjet e pjesshme.

Rendit zhvillimet sipas orarit:

Të Fundit Të Parat

/AV/Shqiptarja.com

TAG:
• fshf
• zgjedhjet 6 mars 2022
• PD
• perplasja berisha basha
• lulzim basha
• sali berisha
• Shkoder