Berisha: Rama, dënim kolektiv
të paparë drejtuesve të policisë

TIRANË - Ish-kryeministri dhe ish-kryetari i PD, Sali Berisha ka reaguar ashpër ndaj shkarkimeve të sotme në polici. "Një akt i verbër urrejtjeje dhe hakmarrjeje: Edvin Kristaq Rama dënoi kolektivisht, si kurrë më parë, me shkarkim nga detyra të gjithë drejtuesit kryesorë të Policisë së Shtetit, Drejtorin e Përgjithshëm, zëvendësdrejtorët dhe drejtorët e të gjitha qarqeve të vendit", nis komentin Berisha.

Ai u ka shprehur "mirënjohjen më të madhe ndaj këtyre shërbëtorëve të shoqërisë dhe kombit që me sakrificën, trimërinë, profesionalizmin e tyre shpartalluan dhe vendosën para ligjit mbi 1000 anëtarë dhe bosa të 206 organizatave dhe grupeve kriminale ndër më të rrezikshmet dhe më të pasurat ne Europë, dhe bën të mundur anëtarësimin e Shqipërisë në NATO, heqjen e vizave, përmbushën me dinjitet detyrimet ligjore në periudhat zgjedhore dhe vendosën një bashkëpunim të shkëlqyer me policitë e vendeve partnere".

Berisha e i ka quajtur shkarkimet një akt të dënimit kolektiv të drejtuesëve të Policisë së Shtetit si hakmarrja primitive të Edivin Kristaq Ramës për bandat e shpartalluara nga Policia e Shtetit si: banda e rrugës së Kavajës, bandat e Lushnjës, Durrësit, Hakmarrja për Drejtësi, ajo e Dritan Dajtit etj, me të cilat Rama kishte shndërruar Tiranën në lavatriçen gjigande të parave të krimit në rajon".

Berisha ka theksuar se "në drejtim të Policisë së Shtetit, Rama emëroi në kundërshtim flagrant me ligjin e Policisë së Shtetit delinkuentë, trafikantë, bashkëpunëtorë të grupeve dhe organizatave kriminale dhe persona që bashkëjetuan në simbiozë të plotë me mafien më të rrezikshme të Europës".

"Qytetare dhe qytetarë, kjo është një kthesë drejt të shkuarës, goditje në palcë e rendit, qetësisë, sigurisë tuaj dhe integrimit të vendit në BE", mbylli komentin e tij Berisha.



Redaksia Online
(mag/shqiptarja.com)

TAG:
• dritan dajti