Bien gurë të mëdhenj në rrugën Skuraj–Burrel, shoferët ndalojnë dhe i largojnë vetë! Firma kontraktore nuk ndërhyn

Aksi rrugor nacional Skuraj –Burrel vijon të jetë problematik për të gjithë përdoruesit e kësaj rruge. Pasditen e kësaj te hëne drejtuesit e automjeteve janë përballur me gurë të mëdhenj në të gjithë rrugën duke vënë në rrezik jetën.

Kanë qenë vetë drejtuesit e automjeteve që janë ndaluar dhe kanë hequr disa nga gurët e mëdhenj që kishin rënë në asfalt.

I gjithë segmenti nga tuneli i madh e deri tek ura e Ulzës është i mbuluar nga gurët, ndërsa asnjë punonjës i firmës kontraktore ''Geci'' nuk është parë në terren për të ndërhyrë.

Vitin e kaluar, kjo firmë, që mirëmban rrugën Milot-Balldre, u vu nën hetim nga prokuroria e Lezhës për shkak të problematikës që u krijua në këtë aks në muajin shkurt nga reshjet e dëborës. Kompania u vu nën hetim për veprën penale "Shpërdorimi i detyrës" me pretendimin se kjo nuk ka marrë asnjë masa për mirëmbajtjen e këtij aksi rrugor i cili u bllokua plotësisht për disa ora pasditen e së shtunës.

Dhjetra qytetare u bllokuan me 14 Shkurt në vitin e kaluar në rrugën Milot-Lezhë, pasi ky segment rrugor u bllokua nga dëbora mbremjen e 13 shkurtit. Kjo situatë u bë dhe objekt akuzash politike, pasi në këtë rrugë mbeti bllokuar për disa ore dhe kreu i opozitës Lulzim Basha.

TAG:
• firma geci
• rruga skuraj burrel
• Lezhe