Bosnja-Hercegovina rihap Ambasadën në Tiranë, Meta pret ministren e Jashtme Turkoviç

Ministrja e Jashtme e Bosnje Hercegovinës Bisera Turkoviç pas takimit me homologen Olta Xhaçka, ka zhvilluar një takim edhe me presidentin Ilir Meta.

Presidenti Meta, duke vlerësuar marrëdhëniet e shkëlqyera mes dy vendeve dhe popujve tanë, u shpreh se e mirëpret vendimin e Presidencës së Bosnje dhe Hercegovinës për rihapjen e ambasadës në Tiranë, si shprehje të interesit të drejtpërdrejtë për nevojën e forcimit të mëtejshëm të bashkëpunimit në të gjitha fushat.

Gjithashtu, Kreu i Shtetit theksoi rëndësinë e rihapjes së ambasadës së Shqipërisë në Sarajevë, sa më parë të jetë e mundur.

Presidenti Meta u shpreh se dialogu politik konstant, bazuar në frymën konstruktive dhe respektin e ndërsjellë, si dhe bashkëpunimi në rritje, përbëjnë premisën më të mirë për thellimin dhe forcimin e mëtejshëm të marrëdhënieve me Bosnje dhe Hercegovinën.

Gjatë këtij takimi, Kreu i Shtetit theksoi mbështetjen që Shqipëria jep në mënyrë të palëkundur për sovranitetin dhe integritetin e Bosnje-Hercegovinës.

Presidenti Meta vlerësoi lart kontributin e komunitetit shqiptar në Bosnje dhe Hercegovinë, dhe atij boshnjak në Shqipëri, si një urë lidhëse tepër të rëndësishme mes të dy vendeve dhe popujve tanë.

Lajmi kryesor:

Xhaçka takim me homologen e Bosnje Hercegovinës: Do të forcojmë dialogun politik! Bashkëpunimi mes 2 vendeve ka potencial të madh (VIDEO)

J.GJ./Shqiptarja.com

TAG:
• Ilir Meta
• ambasade
• Bosnja e Hercegovina
• Bisera Turkovic