Kapiteni i Argjentinës, Lionel Messi, e ka cilësuar si një sfidë të veçantë përballjen ndaj Anglisë në gjysmëfinalen e Botërorit 2026, duke theksuar se do të jetë hera e parë në karrierën e tij që luan kundër kombëtares angleze.

Ylli argjentinas vlerësoi maksimalisht kundërshtarin, duke e përshkruar Anglinë si një nga skuadrat më të forta në futbollin botëror.

“Është një ndeshje e veçantë. Është hera e parë që luaj kundër Anglisë. Kam luajtur kundër pothuajse të gjitha kombëtareve të mëdha, përveç tyre. Janë një skuadër e shkëlqyer, një fuqi e vërtetë dhe është gjithmonë kënaqësi të përballesh me ekipe të këtij niveli. Tani po përpiqem të rikuperohem sa më mirë, sepse kemi kaluar shumë lodhje dhe duam të paraqitemi në formën më të mirë të mundshme për të vazhduar rrugëtimin tonë”, u shpreh Messi.

Pavarësisht karrierës së jashtëzakonshme, Anglia mbetet e vetmja kombëtare elitare me të cilën 39-vjeçari nga Rosario nuk është përballur asnjëherë në një ndeshje zyrtare apo miqësore.

Takimi i fundit mes Argjentinës dhe Anglisë daton më 12 nëntor 2005, në një ndeshje miqësore. Messi ishte pjesë e grumbullimit të trajnerit Jose Pekerman, por nuk mundi të aktivizohej, pasi ishte i pezulluar pas kartonit të kuq të marrë në debutimin e tij ndaj Hungarisë.

Ndërkohë, policia në Atlanta po rrit masat e sigurisë përpara këtij dueli.

"Personeli shtesë është tashmë në terren dhe do të vendoset në zonat e nxehta, zonat e argëtimit dhe zona të tjera me trafik të lartë për të siguruar një përvojë të sigurt dhe të këndshme për të gjithë“, tha policia e Atlantës.

“Masat proaktive të marra synojnë mbrojtjen e publikut, pengimin e aktivitetit kriminal dhe sigurimin që banorët dhe vizitorët të mund të shijojnë në mënyrë të sigurt këtë ngjarje historike“, thuhet më tej në deklaratë.

Stadiumi me 75,000 vende pritet të ndahet në mënyrë të barabartë midis tifozëve, falë pranisë së komuniteteve të mëdha të emigrantëve nga të dyja vendet.

Ekziston një diasporë e madhe argjentinase në Florida dhe mijëra pritet të udhëtojnë për në Atlanta. Numri i tifozëve anglezë pritet të rritet në orët në vijim, me mijëra që do të mbërrijnë për ndeshjen.

Për të lexuar lajme të tjera nga Botërori KLIKONI KËTU.

Për të parë rezultatet e ndeshjeve të Botërorit KLIKONI KËTU.

Rendit zhvillimet sipas orarit:
Ora 13:24
Angli - Argjentinë, përplasje përtej futbollit! Tifozët dhe lojtarët rikthejnë çështjen e Ishujve Falkland

1783941958_boterori2026.JPG

Gjysmëfinalja e Kupës së Botës 2026 mes Argjentinës dhe Anglisë pritet të jetë një sfidë e mbushur me emocione të forta, por edhe me tensione që tejkalojnë kufijtë e futbollit.

Rivaliteti historik mes dy vendeve është rikthyer në qendër të vëmendjes pas këngës "Ylli i katërt", të cilën futbollistët argjentinas e këndojnë pas fitoreve në Botëror. Në tekstin e saj përmenden edhe Ishujt Falkland (Malvinas, sipas Argjentinës), territor në Atlantik i diskutuar prej dekadash mes dy shteteve. Sot e kësaj dite ky është një territor britanik.

Debati për sovranitetin e Ishujve shpërtheu në një luftë të shkurtër, por të ashpër 74-ditore më 2 prill 1982, kur junta ushtarake argjentinase në pushtet nisi një pushtim të ishujve. Pushtimi ishte kryesisht një manovër politike për të bashkuar një popullsi vendase që ishte e mërzitur nga keq menaxhimi ekonomik dhe shkeljet e të drejtave të njeriut.

Kënga u dëgjua sërish pas fitores së Argjentinës ndaj Zvicrës, kur lojtarët e skuadrës e kënduan së bashku në dhomat e zhveshjes. Megjithatë, FIFA ka vendosur të mos marrë masa disiplinore ndaj përfaqësueses argjentinase, pavarësisht se rregulloret e saj ndalojnë mesazhet politike gjatë aktiviteteve sportive.

Përballja mes Argjentinës dhe Anglisë në Atlanta do të jetë e gjashta në historinë e Kupës së Botës mes këtyre dy kombëtareve. Rivaliteti mes tyre është ushqyer edhe nga episode të paharrueshme sportive, si goli me dorë i Diego Armando Maradonës në vitin 1986, që eliminoi Anglinë në çerekfinale.

Ishujt Falkland

S.Dh/Shqiptarja.com