TIRANE - Juria e përbërë nga Z. Aurel Plasari, Z. Bardhyl Londo, Z. Luan Malltezi, Z. Gjergj Shyti dhe Z. Uran Butka vendosi që për vitin 2010-të, çmimin “Lumo Skëndo” ta fitojë Shtëpia Botuese “Onufri” me botimin cilësor të kolanës së plotë të Martin Camaj, ndërsa për vitin 2011-të këtë çmim ta fitojë Shtëpia Botuese “Toena” me botimin cilësor të albumit mbi Princ Vidin me titull "Princi i shqiptarëve" nga Artan Lame.

Çmimi Kombëtar i Bibliofilisë "Lumo Skëndo" i shërben vlerësimit dhe stimulimit të botimeve me vlera të spikatura bibliofilike e intelektuale. I pranishëm në ndarjen e çmimeve ishte sot edhe Ministri i Turizmit, Kulturës, Rinisë dhe Sporteve z.Aldo Bumçi.

Ky është edicioni i shtatë i Çmimit Kombëtar të Bibliofilisë "Lumo Skëndo", për vitet 2010-2011. Z.Bumçi gjatë fjalës së tij tha se, Çmimi Kombëtar i Bibliofilisë "Lumo Skëndo" është një çmim i veçantë, i vetmi i këtij lloji që nxit dhe mbështet cilësinë e botimeve shqiptare.

Sipas ministrit Bumçi, ky 100-vjetor duhet të shërbejë për të vlerësuar figura të harruara, siç është Mit’hat Frashëri (Lumo Skëndo) dhe për t’i vendosur në piedestalin që meritojnë.

librari Lumo Skendo

(Reklama e kohës në media e Librarisë “Lumo Skëndo”)

(dhh/eç/shqiptarja.com)