Brenda një ore, dy fëmijë humbin
jetën në dy aksidente rrugore

TIRANE - Dy fëmijë humbën jetën si pasojë e aksidenteve rrugore në vend. Një fëmijë 6-vjeçar E. Shehu është aksidentuar mesditën e sotme për vdekje nga një makinë, teksa po kthehej nga shkolla. Aksidenti ndodhi në aksin rrugor Porto Romano-Durrës. Ndërsa rreth 30 minuta më vonë, një fëmijë 2 muajsh humbi jetën si pasojë e përplasjes së dy makinave në aksin rrugor Korçë-Pogradec.

Durrës - Mesditën e sotme fëmija 6-vjeçar E. Shehu ishte duke ecur anës rrugës, kur është përplasur nga një manikë tip “Furoristradë” me tarfa TR 9272. Drejtuesi i mjetit ishte Redi Theodhori 52 vjeç nga Tirana. 52-vjeçari ka bërë transportimin e të mitur në spital, por nuk ka arritur t’u mbijetojë dot plagëve të rënda, të marra gjatë përplasjes. Mësohet se në momentin që është aksidentuar, fëmija 6-vjeçar ishte duke u kthyer nga shkolla.


(Në foto vendi i ngjarjes ku humbi jetën 6-vjeçari)

Pogradec- Një aksident i rëndë me pasojë vdekjen e një fëmije dy muajsh dhe plagosjen e pesë të tjerëve ka ndodhur mesditën e sotme në aksin Korçë-Pogradec. Aksidenti ka ndodhur në afërsi të fshatit Leshnicë, si pasojë e përplasjes së dy mjeteve me targa PG 3456 B dhe PG 4738 B. Konfirmohet se shkak i aksidentit ka qenë mosrespektimi i regullave të qarkullimit rrugor. Makina ku udhëtonte fëmija me iniciale S.H. nga fshati Podgorie ka qenë duke dalë nga fshati, ndërsa i ka prerë rrugën automjetit tjetër. Menjëherë në vendin e ngjarjes kanë mbërritur uniformat blu, ndërkohë që të plagosurit janë dërguar në spitalin e Pogradecit. Nga aksidenti kanë mbetur të plagosur prindërit e foshnjës Mariglen dhe Nertila Hamza, gjyshja e tezja, të cilët udhëtonin të gjithë në një automjet. Gjithashtu i plagosur ka mbetur edhe drejtuesi i mjetit tjetër Endri Alldashi. Sipas bluzave të bardha katër nga të plagosurit janë jashtë rrezikut për jetën, ndërkohë që njëri prej tyre është në gjendje të rëndë. Policia po punon për dokumentimin e plotë të ngjarjes.

Redaksia online
(eç/shqiptarja.com)