Brexit, një gjykatës skocez i jep të drejtë Boris Johnson: ai ka fuqinë të pezullojë Parlamentin (VIDEO)

Një pikë në favor të Johnson në betejën që premton të jetë e gjatë.

Nisma e parë ligjore kundër pezullimit të Parlamentit Britanik të vendosur nga Kryeministri Boris Johnson u refuzua sot nga një gjykatës skocez.

Magjistrati i Edinburgut Lord Doherty ka vërtetuar se Kryeministri i ka kompetencat të pezullojë parlamentin duke hedhur poshtë argumentet e paraqitura nga pala paditëse, sipas të cilëve Johnson po vepronte në kundërshtim me Kushtetutën.

Kundër vendimit të Doherty, grupi i 75 deputetëve paditës ka bërë të ditur se do ta apelojë vendimin.

Megjithatë qeveria britanike duhet të merret seriozisht edhe me dy nisma të tjera gjyqësore në Londër dhe Belfast.

Pas pezullimit të punimeve të Parlamentit, Kryeministri britanik Boris Johnson është shprehur se ai dëshironte të "përshpejtonte ritmin" e bisedimeve me Bashkimin Evropian për të përfunduar një marrëveshje të re të Brexit para afatit të 31 tetorit.

"Ne jemi të gatshëm të punojmë me energji dhe vendosmëri për të përfunduar marrëveshjen. Ka ardhur koha që të dy palët të shpejtojnë ritmin," tha Johnson ditën e djeshme.

Boris Johnson, përmes pezullimit të Parlamentit,  duket se ka si qëllim të neutralizojë në një fare mënyre kundërshtarët e Brexit, të cilët nuk do të kishin kohë të ndalnin në Dhomën e Komuneve, një divorc të ashpër me BE.

TAG:
• Britania e Madhe
• Londër
• brexit
• Boris Johnson
• Lord Doherty
• Belfast