Bujar Leskaj: Të ngrejmë vendin në këmbë, se po na godasin Abin dhe Doktorin. Edi Paloka: Duhet të dalim ne të parët në shesh, të na ndjekin, se s'po del njeri

Gjatë diskutimeve me dyer të mbyllura të Foltores, mësohet se deputetët kanë propozuar që rezoluta e përgatitur prej tyre të çohet në të gjitha ambasadat në vend.

“Të shtohet (apel bashkimi) në rezolutë, shoqëria civile, intelektualët, ish-të përndjekurit. Të shtohet goditja ndaj Berishës si ish-kryeministër dhe president si dhe Jamarbër Malltezit si anëtarë i Këshillit Kombëtar, që ka qenë zë i fortë publik duke denoncuar aferat korruptive të Qeverisë.

T’i denoncojmë si goditje të sigurisë juridike në vend. Duhet ta kemi si dokument programatik dhe ta depozitojmë në çdo ambasadë dhe kancelari ndërkombëtare”, – mësohet të jetë shprehur deputeti demokrat Bujar Leskaj.

Ndërsa deputeti tjetër, Edi Paloka, deklaroi:“Këshilli Kombëtar duhet të jetë në pararojë të aksionit. Ne duhet të jemi në ballë të takimeve. Nuk duhet të kemi iluzion se Rama nuk i ka trembur njerëzit me këto akte.

Ndaj duhet të dalim ne, që të na mbështesin qytetarët. Siç tha Berisha, ne kemi bërë protesta dhe më pak njerëz dikur. 500 veta ishim.

Na burgosën, si strategji e tyre për të na trembur. Kemi qene ne situata jo të lehta, por fituam zgjedhjet.

Të dalim ne të parët, t’u japim njerëzve shpresë dhe guxim. Të takojmë strukturat sipas degëve ku jemi të caktuar. Aksioni opozitar ka vijuar në parlament dhe do vijojë”, tha ai.

S.G/Shqiptarja.com

TAG:
• sali berisha