BURREL - Kryetari i Partisë Socialiste, Edi Rama, mori një trajtim shëndetësor, serum, sot në spitalin e qytetit të Burrelit, për shkak të luhatjeve të tensionit, rrugës për atje. Pas stabilizimit të gjendjes, ai doli nga spitali dhe zhvilloi takimin e planifikuar me mjekët në kuadër të Programit të shëndetësisë.

Shqetësimet nisën gjatë udhëtimit, në automjetin me të cilin Rama po udhëtonte. Lajmi u konfirmua për “A1 Report” nga deputeti i PS-së, Qemal Minxhozi. Kryetari i PS-së ishte nisur për në Burrel, në vazhdën e takimeve të tij për të prezantimin e Programit të Partisë Socialiste.

PARTIA SOCIALISTE SQARON NGJARJEN

Pasi mediat e kanë publikuar lajmin në fjalë, Partia Socialiste ka sqaruar se Kryetari i PS-së ka qënë sot në Burrel, për të zhvilluar një takim të planifikuar me mjekët e spitalit të këtij qyteti, në kuadër të javës së shëndetësisë.
 
Gjatë kësaj vizite, Kryetari i PS-së ka pasur luhatje tensioni dhe, pas një trajtimi të shkurtër me serum, gjendja e tij shëndetësore është stabilizuar. Këtë e ka konfirmuar mjeku Hasan Ceni i spitalit të Burrelit.

RAMA: LAJM I DEFORMUAR
Ndërsa vetë Edi Rama, përmes një mesazhi në Twitter, foli gjatë pasdites për “një lajm të deformuar për shëndetin tim që mori dhenë”. Duke kërkuar ndjesë “atyre që u shqetësuan”, kreu i PS siguroi mbështetësit e tij se problemi shëndetësor nuk ishte “asgjë serioze”. “Pas takimit në Burrel jam në zyrë në PS”, përfundon mesazhi i liderit socialist.

(Lajm i përditësuar)

Redaksia Online
(ar.sh/shqiptarja.com)