Buxheti,fund përmbytjeve te 'Don 
 Bosko', shërbim urban te "burgu"

TIRANË - Ndërhyrjet në kanalizimin e ujërva të zeza në rrugën “Don Bosko” si dhe rehabilitimi i trotuareve, do të lehtësojë jetën e qytetarëve ne këtë lagje të kryeqytetit. Me ardhjen e shirave, banorët e njësisë 9 nuk do të përballen me torturat që sjellin kanalizimet e bëra jashtë çdo lloj standartdi, që çdo vit e përmbysin këtë zonë. Ky lajm është bërë publik nga nënkryetari i Bashkisë Arbjan Mazniku, gjatë prezantimit të projektbuxhetit të vitit 2016 në njësinë nr.9.

Me buxhetin e vitit 2016, do të bëhet rikonstruksioni i rrugës “Ibrahim Ndroqi”, si dhe do të vendoset shërbim urban në rrugën “Jordan Misja”, ose njohur ndryshe si rruga e burgut 313.

Më tej, Mazniku u ndal në gjendjen financiare të vështirë dhe me 4 miliardë lekë borxh ku u gjet Bashkia dhe projektet që priten të nisin vitin që vjen.

“Situata, për fat të keq, nuk është e mirë. Qyteti e ka gjendjen financiare të ngarkuar, me shumë borxhe nga e kaluara. Kemi bërë një inventar të totalit të të ardhurave dhe shpenzimeve. Vit pas viti borxhet kanë zënë borxhin dhe sot gjendemi në një situatë, ku totali i borxheve të bashkisë është 4 miliard lekë. Kjo, pothuajse, sa një buxhet i bashkisë në një vit të tërë”, tha Mazniku.

Lidhur me projektet dhe punët që do mbështeten financiarisht vitin e ardhshëm në mënyrë konkrete për Njësinë Administrative nr. 9, u përmendën përmirësimi i infrastrukturës arsimore dhe rrugore. Gjithashtu, për përmirësimin e situatës financiare, ai ka bërë të ditur se do vijë në ndihmë edhe krijimi i Agjencisë Tirana Parking, e cila do sjellë të ardhura shtesë në arkën e bashkisë.

Në fushën e arsimit, bashkia do të kërkojë ndihmën e Fondin e Zhvillimit të Rajoneve ose edhe nëpërmjet partneriteteve publike-private, për ndërtimin e një shkolle të re, pranë zonës ish- Uzinës Dinamo. 

Redaksia online
(shqiptarja.com)