Pa u bërë një javë nga rihapja, rruga Qukës-Qafë Plloçë, ka pësuar sërish shembje dhe çarje të asfaltit. Kjo arterie e rëndësishme që lidh Përrenjasin me Pogradecin qëndroi e mbyllur 10 ditë për shkak të shembjes së masivit në zonën e tuneleve, pranë Kalivaçit. Ndërsa tashmë rruga ka shfaqur dëmtime të reja tek theksat e Trebinjës, siç shihet edhe në pamjet që sjell Report Tv.

Asfalti ka pësuar çarje të thella. Po kështu vihet re cedim i shtratit të rrugës. Në pjesën e poshtë, shembja e dherave është masive. Punëtorët e kompanisë dhe mjetet e rënda shihen në terren. Jashtë kamerave thanë se po vendosin pilotë në përpjekje për të stabilizuar terrenin në një zonë mjaft problematike sa i përket erozionit.

Ndërsa drejtuesit e mjeteve, në këto kthesa të rrezikshme do duhet të ulin shpejtësinë, pasi qarkullimi kryhet vetëm me një korsi, në një gjatësi prej 1 kilometër. Të shqetësuar ata thanë se rruga është e rrezikshme dhe është kthyer në burim për aksidente.

“Rrugë e rrezikshme. Kalojmë shpesh. Punime të dobëta, rrezikohesh edhe nga gurët që bien.

E rrezikshme sa duash.

E rrezikshme, hedhin nga pak zift”, thonë shoferët.

Rruga Qukës–Qafë Plloçë me gjatë 43 km ka shfaqur problematika të shumta, edhe pse ka vetëm 5 muaj që është inauguruar dhe ka kushtuar 260 milionë euro. Gjatë ndërtimit, ajo u tenderua nga ARRSH-ja në tre lote.

Loti i dytë i cili ka pësuar çarjen është ndërtuar nga kompania “ALB-BUILDING”, me aksionere Odhise Breshen dhe Pëllumb Beten. Ashtu si loti i parë i ndërtuar nga kompania “2T” e vëllezërve Sako, edhe ky segment rezultoi mjaft problematik.

K.B/SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Ing.: 24/01/2026 15:36

    Mire qe e paskan ngjit se paska qene duke rreshqit e gjitha

    Përgjigju
  • Sondazhi i ditës: 31 Mars, 11:25

    A besoni se Drejtori i ri Policisë, Hita do luftojë krimin dhe korrupsionin?

Lajme të tjera