Çelet Festivali Marubi
në qytetin e Shkodrës

TIRANE- Arkivat e “Marubëve”, mjeshtërve të fotografisë shqiptare, janë restauruar dhe po dalin në dritën e diellit. Ekspozita me 60 foto historike të përzgjedhura nga Fototeka Marubi është çelur që më 10 korrik me synim promovimin e turizmit ndërmjet Shkodrës dhe Ulqinit”. Pas këtij projekti ndërkufitar IPA Shqipëri - Mali i Zi, financuar nga Bashkimi Europian në Tiranë Shkodra ka pritur mbrëmë edhe Festivalin Marubi. Marubi Festival do mbahet nga data 16 korrik deri më datën 7 gusht 2014.

“Qyteti i Shkodrës me këtë rast do të jetë një vendtakim kulturor, ku do të përfshihen intelektualë nga Tirana e Shkodra, por edhe turistë që do të vizitojnë qytetin”, tha drejtori i Fototekës Marubi, Luçiano Bedeni. Bedeni thekson se një jave pas inagurimit të “Marubi Route”, Bashkia Shkodër në kuadër të programit IPA Cross-border të Bashkimit Europian po vazhdon punën me programin e tyre “për të ringjallur vlerat e harruara të djepit të kulturës shqiptare, duke përdorur metoda gjithëpërfshirëse si konkursi i fotografisë dhe aktivitetet që do të mbajnë gjallë jetën kulturore artistike të Shkodrës gjate ditëve të verës.

Kjo iniciativë historiko-kulturore organizohet për herë të parë në qytetin e Shkodrës. Bedeni shprehet se kjo iniciativë i shërben çdo shkodrani e çdo shqiptari, që të ndërgjegjësohet “për vlerat që bart një qytet bashkëkohor e tradicional njëkohësisht si Shkodra”. Gjatë ditëve të festivalit në Shkodër do të zhvillohen këto aktivitete: Konkursi i fotografisë: “Eja fotografo Shkodrën dhe fito”, që do të bëhet në datat 19 deri më 20 korrik. Për konkursin janë menduar çmime të mëdha siç shprehen organizatorët “për një pasion të madh, në një qytet të mrekullueshëm!”

Më 19 Korrik, Konkursi 1-ditor i Fotografisë bëhet i hapur për të gjithë të pasionuarit e fotografisë. Gjatë ditëve të festivalit do të ketë edhe seminare të caktuar këto në fundjavë, të drejtuara nga fotografët më të mirë shqiptarë.


Shkrimi u botua në Shqiptarja.com (print) në 17 Korrik 2014

Redaksia Online
(d.a/shqiptarja.com)