Çetnikët shpërndajnë fletushka

Një numër i gazetave, si material propagandues “Srpske Novine”, janë identifikuar dhe sekuestruar në Vushtrri, pas ndalimit dhe kontrollit të një automjeti nga policia e Kosovë. Materiali i identifikuar, sipas personave që po e bartnin, ishte siguruar në veri të Mitrovicës ndërsa destinimi i këtij materiali propagandues, ishte një nga kishat ortodokse serbe të qytetit të Shtimes.

Rreth orës 10:30 min, njësitë e trafikut rajonal të Policisë së Kosovës, gjatë një kontrolli në trafik, në rrugën magjistrale Mitrovicë – Prishtinë, përkatësisht në hyrje të Vushtrrisë, kanë ndaluar një veturë civile tip “Opel Vectra” me targa “KS”, me pesë persona në automjet, dy meshkuj dhe tri femra, gjithë të përkatësisë etnike serbe.

“Gjatë kontrollit të automjetit, njësitë policore kanë identifikuar një sasi prej 38 gazetave të emëruara si ‘Srpske Novine’, të shtypura në Toronto të Kanadasë, në alfabetin cirilik në gjuhën serbe, në emër të ‘lëvizjes çetnike të Ravna Gorës’ (origjinal ‘Cetnicki Ravno Gorski Pokret’)”, thuhet në komunikatën e policisë.

Policia e Kosovës, ka sekuestruar materialin, ndërsa me vendim të prokurorit publik, rasti është iniciuar si vepër penale e paraparë në bazë të nenit 115 të Kodit Penal të Kosovës, “Nxitje e urrejtjes, e përçarjes ose e mosdurimit kombëtar, racor, fetar a etnik”.

Ndaj një personi, të gjinisë femërore, S. ANTONIJEVIC, (1962), banore e Beogradit, Republika e Serbisë, është caktuar masa e ndalimit policor deri në 48 orë, pasi e njëjta ka deklaruar se i tërë materiali i takonte asaj ndërsa katër personat e tjerë, pas deklaratave të dhëna në Polici, janë liruar nga lokalet policore.




/rg/shqiptarja.com/