Gjykata e Apelit ka vendosur që të shtyjë sërish për të 9-ën herë seancën për deputetin e Partisë Demokratike, Ervin Salianjin këtë të hënë. Seanca është shtyrë për datën 7 mars. Avokati i tij, Ledio Braho ka dorëzuar një kërkesë duke argumentuar se duhet të jetë i pranishëm në një aktivitet në qytetin e Vlorës dhe për këtë arsye nuk mund të ishte prezent sot në seancë.

Përmes një shkrese avokati Braho kërkonte shtyrje, pasi nën funksionin e anëtarit të KAS në KQZ, thoshte se ishte pjesëmarrës në një aktivitet ne Llakatund e Novoselë në Vlorë. Sipas tij, aktiviteti me temë “Me romët, për romët” organizohej nga ambasada britanike në Shqipëri.

Por në fakt burime bëjnë me dije se aktiviteti në Llakatund nuk ka qenë i pranishëm ambasadori britanik dhe nuk kuptohet arsyeja në fakt pse një anëtar i KAS të jetë i ftuar në një aktivitet social. Braho ka kërkuar shpesh që Avokati i Popullit të monitoronte drejtësinë, duke e vënë theksin te vonesat artificiale ndërkohë që vetë nuk shkon në gjyq.

Salianji u shpall fajtor për veprën penale 'kallëzim i rremë' në lidhje me çështjen "Babale" dhe u dënua me një vit burg nga gjykata e Shkallës së Parë. Në Apel e ka çuar çështjen dhe gazetari Jetmir Olldashi, i cili u dënua me 6 muaj burg të konvertuar në 100 orë shërbim komuniteti. Nëse Apeli do të konfirmojë vendimin e Shkallës së Parë atëherë deputeti Salianji, rrezikon burgun. 

Deputeti Ervin Salianji dhe gazetari Jetmir Olldashi u shpallën fajtorë nën akuzën e 'kallëzimit të rremë' lidhur me inskenimin e audio-përgjimit me qëllim përfshirjen e vëllait të ish-ministrit të Brendshëm Fatmir Xhafaj në trafikun e drogës. Gjykata e shkallës së parë vendosi 1 vit burgim për ish-deputetin Salianji me akuzën e kallëzimit të rremë kryer në bashkëpunim.