Champions League zhvillon sot katër ndeshjet e fundit play-off, Juventusit i duhen tre gola kundër Galatasarayt! Në fushë Real Madridi, PSG e Dortmundi

Trajneri i Galatasarayt, Okan Buruk, ka folur me kujdes para sfidës së kthimit kundër Juventusit, duke theksuar se epërsia 5-2 e turqve nga ndeshja e parë e play-off-it të Champions League nuk garanton asgjë.

Në një intervistë për 'Sky Sport', tekniku turk u shpreh se skuadra e tij duhet të qëndrojë e përqendruar maksimalisht, pavarësisht fitores bindëse në përballjen e parë.

“Gjithçka është ende e hapur. Kemi fituar vetëm ndeshjen e parë. Na pret një sfidë shumë e rëndësishme dhe e vështirë në kthim. Juventusi është një ekip i fortë dhe drejtohet nga një trajner i shkëlqyer si Spalletti. Nuk jemi kualifikuar ende, kemi edhe 90 minuta për të luajtur”, deklaroi Buruk.

Galatasaray udhëton me avantazhin e tre golave, por trajneri turk nuk dëshiron ulje të ritmit.

“Ndeshja e dytë do të jetë ndryshe. Duhet të luajmë lojën tonë dhe të jemi edhe më të fortë se në takimin e parë. Nuk jemi të qetë”, theksoi ai.

Tekniku veçoi disa nga rrezikshmëritë e kundërshtarit, duke përmendur emra si Kenan Yildiz, Francisco Conceiçao dhe Jonathan David si lojtarë që mund të bëjnë diferencën.

Sa i përket gjendjes së skuadrës, Buruk konfirmoi se sulmuesi Victor Osimhen ka kaluar problemin në gju dhe është gati për të luajtur, ndërsa rotacioni i bërë në ndeshjet e fundit ka ndihmuar ekipin të ruajë freskinë fizike.

Juventusi dhe Galatasaray do përballen sot në orën 21:00 në Torino, për sfidën e kthimit në Champions League.

Real Madridi do të përballet sot me Benficën pa yllin e sulmit, pasi është konfirmuar mungesa e Kylian Mbappe për ndeshjen e kthimit në fazën play-off të Champions League, e cila do të zhvillohet sot në orën 21:00 në 'Bernabeu'.

Sulmuesi francez vazhdon të ketë probleme me gjurin e majtë dhe u detyrua të ndërpresë para kohe seancën stërvitore të së martës. Ekzaminimet mjekësore të kryera më pas treguan se gjendja e tij është ende larg rikuperimit, duke e bërë të pamundur aktivizimin kundër portugezëve.

Mungesa e tij është e pashmangshme, ndërsa ende nuk dihet sa do të zgjasë periudha e rikuperimit. Zbatimi i një protokolli të veçantë trajtimi është konsideruar i domosdoshëm për sulmuesin francez.

Paradoksalisht, vetëm pak orë më parë trajneri Alvaro Arbeloa kishte deklaruar se Mbappe ishte gati për të luajtur, duke vlerësuar përkushtimin e tij maksimal ndaj skuadrës. Megjithatë, zhvillimet e fundit kanë ndryshuar situatën.

Në mungesë të golashënuesit kryesor, pritet që nga minuta e parë të aktivizohet Gonzalo Garcia, i cili do të ketë barrën kryesore në repartin sulmues të “Los Blancos” në një duel vendimtar për kualifikimin.

Veç Mbappesë, për Realin në sfidën e sotme do mungojnë edhe Jude Bellingham, Dani Cabellos, Eder Militao, Dean Huijsen dhe Rodrygo.

Luciano Spalletti beson se Juventusi mund të tentojë mrekullinë në Champions League, por thekson se mbështetja e tifozëve do të jetë vendimtare në sfidën e kthimit kundër Galatasarayt.

Bardhezinjtë zbresin në fushë sot në mbrëmje në orën 21:00 me misionin e vështirë për të përmbysur humbjen 2-5 të ndeshjes së parë dhe për të siguruar një vend në raundin e 1/8-ve.

Në konferencën për shtyp para ndeshjes, tekniku italian e cilësoi momentin delikat për skuadrën, duke kërkuar bashkim mes ekipit dhe tifozëve.

“Ka ndeshje që nuk luhen vetëm në fushë, por edhe në atmosferë. Kemi nevojë për 'zemrën' e tifozëve tanë. Me ta pas nesh jemi më të fortë. Është një periudhë e vështirë dhe u kërkojmë të na qëndrojnë pranë. Do të luftojmë deri në fund”, deklaroi Spalletti.

Trajneri theksoi se dita e pushimit ka ndihmuar ekipin të rikuperohet sa më mirë të jetë e mundur, ndërsa vëmendja është e gjitha te përballja me turqit e Galatasarayt.

“Jemi përgatitur maksimalisht për vështirësitë e kësaj ndeshjeje. Për të ardhmen do të mendojmë vetëm pasi të përfundojë kjo sfidë dhe të shohim rezultatin”, u shpreh ai.