Cilat janë skemat në qeveri dhe
kuvend pas largimit të LSI

TIRANE - Largimi i pritshëm i LSI nga koalicioni qeverisës me PD krijon një konfiguracion të ri parlamentar, që mund të sjellë rrëzimin e qeverisë së kryesuar nga kryeministri Berisha. Aktualisht PD ka 68 deputetë, por bashkë me PR dhe nëse qëndron në koalicion PDIU bën gjithsej 71 deputetë. Mësohet se pavarësisht se është larguar Oketa, vota e tij është “mbuluar” një për një nga ish-deputeti socialist tashmë i pavarur Islami. Po si mund të largohet Berisha nga posti i kryeministrit.

MOCIONI I BESIMIT

Nëse Berisha s’mund të bëjë shumicën e thjeshtë në momentin e parë të ballafaqimit me mocion besimi apo mosbesimi, qeveria bie. Nëse opozita nuk i ka numrat për një kryeministër të saj atëherë presidenti shpërndan Kuvendin e vendi kalon në zgjedhje të parakohëshme, por me Berishën kryeministër në detyrë.

Kushtetua e ka të përcaktuar qartë mënyrën se si verifikohet mbështetja për kreun e qeverisë. Kryeministri në rastin më të mirë kur kërkon të verifikojë mbështetjen në Kuvend “bën mocion besimi për vete dhe qeverinë në bazë të nenit 104 të Kushtetutës që thotë se kryeministri ka të drejtë t’i paraqesë Kuvendit mocion besimi ndaj Këshillit të Ministrave.

Në rast se mocioni i besimit votohet nga më pak se gjysma e të gjithë anëtarëve të Kuvendit, Kryeministri, brenda 48 orëve nga votimi i mocionit, i kërkon Presidentit shpërndarjen e Kuvendit. Sipas Kushtetutës kërkesa për mocion besimi nuk mund të paraqitet gjatë periudhës së shqyrtimit të mocionit të mosbesimit sipas nenit 105, ndërsa votimi i mocionit s’mund të bëhet pa kaluar 3 ditë nga paraqitja e tij.

MOCIONI I MOSBESIMIT

Por mënyra më efikase për largimin e kryeministrit është momenti kur opozita shfrytëzon të drejtën e mocionit të mosbesimit. Kështu në bazë të nenit 105, “një e pesta e deputetëve ka të drejtë të paraqesë për votim në Kuvend një mocion mosbesimi ndaj Kryeministrit në detyrë, duke propozuar një Kryeministër të ri.

Kuvendi mund të votojë mocion mosbesimi ndaj Kryeministrit vetëm duke zgjedhur me votat e më shumë se gjysmës së të gjithë anëtarëve të tij një Kryeministër të ri. Presidenti dekreton shkarkimin e Kryeministrit në detyrë dhe emërimin e Kryeministrit të zgjedhur jo më vonë se 10 ditë nga votimi i mocionit në Kuvend”.

Ndërsa në bazë të nenit 106 “kryeministri e ministrat janë të detyruar të qëndrojnë në detyrë deri në formimin e qeverisë pasardhëse”. Nëse kryeministri aktual rrëzohet me mocion mosbesimi, por dhe kandidati i opozitës s’merr votat e nevojshme për të qeverisur, ose në rastin kur kryeministri nuk arrin të fitojë besimin e Kuvendit me kërkesën e tij përmes mocionit të besimit, Kuvendi shpërndahet në të gjitha rastet dhe vendi shkon në zgjedhje me këtë qeveri dhe këtë kryeministër në detyrë.

Pra në të gjitha rastet, vetëm nëse opozita zgjedh kryeministrin e ri pas rrëzimit me mocion mosbesimi të Berishës, vendi shkon në zgjedhje me kryeministrin Berisha. Këto janë disa nga skemat e qeverisjes pas largimit të mundshëm të LSI.

Shkrimi  u botua sot në gazetën Shqiptarja.com (print) 02.04.2013

Redaksia Online
(b.m/shqiptarja.com)

TAG:
• OSBE