Çnjerëzore në Pejë/ Infermierja dhunon nënën e dëshmorit në azil, arrestohet bashkë me kolegen që e filmoi! Zbardhet dëshmia: U vetëmbrojta, më sulmoi e para (VIDEO)

Pas rastit të dhunimit të nënës së dëshmorit kosovar Taulant Nura në azilin në Pejë, një tjetër denoncim vjen ndaj kësaj qendre.

Tomor Hasani, një qytetar nga Kosova thotë se ai ka dërguar një ankesë lidhur me rastin në Ministrinë e Punës dhe Mirëqenies Sociale, por nuk ka marrë përgjigje. Ai tha se bëhet fjalë për hallën e babait të tij. Hasani thotë për mediat kosovare se i është bërë presion edhe nga pronari i Qendrës “Orenda”, Anton Rasaj, që ta tërheq ankesën nga ministria .

Hasani tha se e afërmja e tij nuk është keqtrajtuar fizik, por është ankuar se infermieret nuk kujdesen mirë për të gjatë natës.

“Fatkeqësisht pas ankesës time nuk është marrë asnjë masë nga institucioni në fjalë. Përkundrazi fëmijëve të familjares time që është e vendosur aty, u është bërë presion nga pronari i kësaj qendre Anton Rasaj, që të më bindin ta tërheq këtë ankesë”, ka thënë Hasani për mediat kosovare.

Kryeministri i Kosovës, Albin Kurti ka reaguar për dhunën ndaj të moshuarës në Kosovës. Ai e ka cilësuar si një ngjarje të tmerrshme, ku tha se organet kompetente kanë nisur punën për të çuar përpara drejtësisë përgjegjëset.

“Ajo që pamë sot ishte e tmerrshme. Nuk ka qytetar i cili s'është shokuar, kurse institucionet me të marrë vesh sulmin mbi nënën, të moshuarën, në Qendrën Strehimore në Pejë, janë aktivizuar dhe kanë vepruar.

Të moshuarit janë më të dashurit tanë. Ata kanë kontribuar në shoqëri në aq shumë aspekte për kohën më të gjatë sesa të gjithë ne të tjerët. Do të qëndrojmë pranë tyre si me vendime e përgjegjësi qeveritare, gjithashtu edhe me ndenjën dhe përkujdesjen qytetare”, shkruan Kurti.

Naim Pelaj, babai i infermieres Aurona Pelaj, që sulmoi sot fizikisht të moshuarën në Pejë, ka kërkuar falje publike. Pelaj i ka kërkuar falje edhe familjes së të moshuarës Nura. Ai iu ka bërë thirrje organeve të drejtësisë, që të merren me rastin.

“E dashura familje e nënës së dëshmorit të lirisë, Taulant Nura, që falë gjakut të tij ne sot e gëzojmë lirinë, duam të ndajmë dhimbjen me ju dhe ndjejmë me ju nga thellësia e shpirtit tonë për lëndimin qe ju ka shkaktuar vajza jonë. E di që po kaloni momente të rënda, por na lejoni që t’ju kërkojmë falje publike në emër të familjes sime Pelaj, nga Novosella e Pejës, juve familja Nura dhe mbarë popullit shqiptar. Dashtë Zoti që ky rast të mos përsëritet më dhe ju jemi borxhli moralisht dhe shpirtërisht gjithë jetën juve, familjes Nura nga Gjakova, për tragjedinë shpirtërore që ju shkaktoi vajza jonë. Gjithashtu, në rastin e vajzës sonë, kërkojmë nga organet e rendit që të veprojnë sipas ligjeve të Republikës së Kosovës për veprat, për të cilat e ngarkojnë”, ka thënë Pelaj për mediat në Kosovë.

Me lotët që i rridhnin në faqe, e moshuara që u dhunua nga infermierja në azilin e pleqve në Pejë pohonte me kokë se ishte mirë.

Në momentet kur e bija mbërriti në shtëpinë e të moshuarve që ta merrte, e moshuara shfaqet me lot në sy dhe thotë: “Mirë jam”, ndërsa vajza e përqafon dhe e puth.

E tronditur nga ngjarja e rëndë, vajza shprehet se po presin që të përfundojnë procedurat dhe ta marrë nënën në shtëpi.

Ky është Taulant Nura, dëshmor i vendit që ra për atdhe në moshë të hershme, vetëm 17 vjeç. Ai sot u kthye në qendër të vëmendjes jo për trimërinë e tij, por sepse iu rrah në mënyrë çnjerëzore nga infermieret që ishin paguar për t’u kujdesur për të.

Taulant Nura

Zbardhet dëshmia e infermieres që dhunoi të moshuarën.

 “Unë kur kam filluar punën ajo veç ka qenë banore e shtëpisë dhe se nga mjeku është konstatuar se e njëjta ka çrregullime mendore. Në ditën kur ka ndodhur rasti ajo ka qenë shumë agresive dhe kohë pas kohe përjetonte kriza nervoze dhe për këtë e kemi njoftuar doktorin. Atë ditë, e kemi pasur për detyrë që t’ua ndërrojmë pampersat pasi e moshuara (viktima) e kishte kryer nevojën fiziologjike dhe me duart e saj e ka ndotur hapësirën. Unë e kam dëgjuar një zhurme te banjoja dhe kam shkuar që të shikoj. Aty koleget e mija kishin pasur telashe dhe desha të ju ndihmoj. Ajo (viktima e moshuar) më ka sulmuar dhe më ka shkaktuar lëndime në dorë, më ka sulmuar me shqelm e para. Unë nuk kam përdor dhunë e as forcë të madhe përveç me ndalu sulmin e saj ndaj meje. Ajo atë ditë e ka sulmuar edhe një banore tjetër. Në shkollë jemi mësuar se personat që paraqesin rrezik për personelin dhe kanë probleme psikike duhet të tregohemi dominant ndaj tyre. Unë jam e vetëdijshme se veprimi ka qenë i tepruar dhe nën afekt, por ajo e para më ka sulmuar dhe veprimet e mija kanë qenë paralajmëruese dhe jo me forcë të madhe. Koleget e mija janë munduar ta vënë nën kontroll atë (të moshuarën). Janë munduar me forcë ta ndërrojnë, ka qenë e fuqishme dhe është dashtë disa veta ta vënë nën kontroll”, mësohet të ketë thënë infermierja, raportojnë mediat kosovare.

Anton Rasaj, pronari i azilit të pleqve ‘Orenda’ në Pejë ku u dhunua e moshuara ka kërkuar falje për ngjarjen e rëndë dhe se punëtoret i ka larguar nga puna.  

“Kërkojmë ndjesë për pamjet e rënda që na kanë goditur secilin! Unë Anton Rasaj sot si aksionari më i madh në shoqërinë Orenda në Pejë kam rastisur të jem këtu me familje. Me urgjencë kam marr veprimet personalisht. Nuk kam fjale ta përshkruaj se si jam ndjere kur e kam parë sjelljen e infermiereve.

Ju njoftoj se pa asnjë hamendje, menjëherë i kam larguar nga puna personelin në fjalë, kam kërkuar që me shpejtësi të veprohet, e për dëmin e shkaktuar nga ato do t'i ndjekim përgjegjësit në procedurat tjera ligjore po ashtu”, tha Anton Rasaj.

Është arrestuar burri i njërës nga infermieret që shihen në video.  Ai është arrestuar pasi dyshohet që e ka kërcënuar pronarin e kësaj qendre, Anton Rasaj. Tashmë, janë arrestuar 2 infermiere, derisa 4 janë suspenduara.

“E papranueshme dhuna e shfaqur në video. I tërë zinxhiri menaxhues dhe autorët e këtij krimi, të dalin para drejtësisë” , kjo ishte thirrja e ish-kryeministrit të Kosovës  dhe kryetarit të Aleancës për Ardhmërinë e Kosovës, Ramush Haradinaj i cili ka reaguar në lidhje me rastin e dhunimit të moshuarës në një azil në Pejë, Kosovë.

“I tronditur nga rasti në Pejë, ku nëna e Dëshmorit Taulant Nura, dhunohet fizikisht nga ato që duhet të kujdesen për të. E papranueshme dhuna e shfaqur në video. I tërë zinxhiri menaxhues dhe autorët e këtij krimi, të dalin para drejtësisë. Rastet e tilla janë aq sa të dhimbshme po aq të neveritshme dhe nuk kanë vend në Kosovën tonë! Nanat, të moshuarit dhe çdo kategori e ndjeshme e shoqërisë tonë, meritojnë trajtim dhe dinjitet. Uroj që këto raste të mos përsëriten më kurrë!”, shkruan Haradinaj në Facebook.

E moshuara që u dhunua nga infermieret në azilin e pleqve ‘Orenda’ në Pejë është marrë nga familjarët e saj. Ishte dhëndri që e mori dhe foli para mediave duke thënë se e gjitha ka ardhur pas publikimit të videos. Ai ka thënë se e moshuara vuan nga alzheimeri dhe nuk ka treguar ndonjëherë që është keqtrajtuar.

“Vuan nga alzheimeri dhe nuk ka mundur ta japë ndonjë shpjegim ndaj vajzës së saj”, u shpreh ai para gazetarëve duke shtuar se e ka humbur djalin në moshën 17-vjeçare.

E moshuar ndaj së cilës është ushtruar dhunë sot në Shtëpinë e Pleqve në Pejë është nënë e dëshmorit Taulant Nura. Ka qenë këngëtari Gold Ag që ka bërë të ditur këtë detaj.

Ajo është në atë shtëpi meqë nuk ka kush të përkujdeset për të.

Postimi i Gold Ag

Mediat Kosovare kanë mësuar emrin e infermieres që ka rrahur një të moshuar në mënyrë ç’njerëzore në Pejë. Ato bëjnë të ditur se emri i të dyshuarës që shihet në video duke ushtruar dhunë ndaj të moshuarës është Aurona Pelaj. Ajo nga fshati Novosellë e Pejës dhe ka disa muaj që punon në qendrën e të moshuarve “Orenda” në Pejë. Pelaj është arrestuar nga Policia e Kosovës.

Vajza e së moshuarës, e cila është keqtrajtuar nga punëtoret e Qendrës për të Moshuar në Pejë është shprehur e tronditur për rastin. Ajo ka treguar se është e tmerruar dhe në një gjendje jo të mirë emocionale.

Telefonin e saj e ka kapur pas pak çasteve bashkëshorti, i cili ka thënë se me të marrë informatën ka lajmëruar policinë në rajonin e Gjakovës.

“E kam lajmëruar policinë e Gjakovës, siç duket e kanë arrestuar, të shohim tash kush është ajo, pse është përdorur ajo dhunë”, ka thënë dhëndri i së moshuarës për RTV Dukagjini.

Ministri i Brendshëm, Xhelal Sveçla, ka reaguar pas publikimit të një videoje që shfaq dhunën që ushtron një infermiere ndaj një të moshuare në Pejë.

“Me shqetësim kemi parë të gjithë pamjet e keqtrajtimit të një gruaje të moshuar nga një grup vajzash, në një shtëpi të përkujdesjes së të moshuarve në Pejë. Nga Policia e Kosovës jam njoftuar që deri më tani janë arrestuar dy nga dhunueset dhe hetimet po vazhdojnë. Fuqishëm bëj thirrje për sjelljen para drejtësisë të të gjithë personave të implikuar në këtë akt çnjerëzor”, ka shkruar Sveçla. 

 Policia e Pejës ka konfirmuar  arrestimin e dy vajzave për rrahjen brutale të të moshuarës në Pejë. Bëhet fjalë për vajzën brune që ka dhunuar të moshuarën si edhe personin që ka filmuar. 

"Arrestohen dy (2) persona tё dyshuar

Pejë, 2 nëntor 2022. Policia e Kosovës, Stacioni Policor nё Pejё, duke u bazuar nё video incizimin i cili ka qarkulluar nё media sociale, ku shihet njё punёtore nё njё shtёpi tё pleqve nё Pejё, e cila ёshtё duke ushtruar dhunё ndaj njё të moshuare.

Policia menjёherё ёshtё vёnё në veprim dhe rreth orёs 14:10, ka identifikuar lokacionin dhe ka arrestuar dy (2) tё dyshuara lidhur me rastin. Tё dyshuarat janё duke u intervistuar nga hetuesit e Stacionit Policor nё Pejё dhe nё koordimin tё plotё me prokurorin e shtetit do tё merren veprime të mëtutjeshme", njofton policia.