COVID/ Më shumë se 1 milion e 90 mijë vaksinime të kryera në vend, Manastirliu: E vetmja mënyrë për të frenuar përhapjen e virusit

Ka shkuar në 1,095,453 numri total i vaksinimeve të kryer anë vend, ku vetëm në 24 orë janë vaksinuar më shumë se 13 mijë qytetarë. Shifrat u bënë me dije nga Ministrja e Shëndetësisë, Ogerta Manastirliu nëpërmjet një postimi në Facebook, ku shkruan se vaksinimi është e vetmja mënyrë për të frenuar përhapjen e COVID-19.

"Më shumë se 13 mijë qytetarë u vaksinuan sot, ndërsa janë 1,095,453 vaksinime të kryera që prej fillimit të këtij procesi jetik. Vetëm përmes vaksinimit mund të frenojmë përhapjen e Covid19, duke mbrojtur veten dhe njerëzit e dashur", thotë Manastirliu.

Më herët gjatë ditës së sotme, e pranishme në Durrës, ku ndoqi nga afër procesin e vaksinimit me njësitë e lëvizshme në zonën e Sukthit, Manastirliu u shpreh se duhet ndërgjegjësim, për shkak edhe të alertit nga varianti Delta.

Prej fillimit të vaksinimit janë kryer në total 1.082.424 doza të vaksinës ndaj COVID-19. Prej tyre 472.886 qytetarë i kanë marrë të dyja dozat e vaksinës anti-COVID. Vaksinimi masiv vijon edhe nëpërmjet njësive të lëvizshme në komunitet, krahas vaksinimit në pikat e përqendruara të vaksinimit dhe në qendrat shëndetësore kudo në vend. Java e vaksinimit të hapur për qytetarët +18 vjeç vijon deri të dielën, nga ora 08:00 e mëngjesit deri në 8 të mbrëmjes, për të kryer pa kufizim vaksinën anti-COVID.

 

/a.m./Shqiptarja.com

TAG:
• ogerta manastirliu
• COVID-19
• koronavirus ne shqiperi
• Vaksina Covid
• vaksinimi masiv