Fjalori i Cambridge e përcakton Cyberbulling si “aktivitetin e të përdorurit të internetit për të lënduar ose frikësuar dike tjetër, veçanërisht duke i dërguar mesazhe të pakëndshme”. Ndërsa Smith et.al, e përcakton si veprimtari të dëmshme që ka karakter të përsëritur duke iu dërguar mesazhe elektronike një individi ose një grupi individësh që kanë prirje ta shmangin dëmin. Sipas Vogels, cyberbulling është vetëm njëra prej sjelljeve të ‘ulëta’ online që përjetohet nga 46% e të rinjve amerikanë. Pasoja e cyberbulling mund të jenë ankth, depression, ulje e vetëvlerësimit etj, Kowalski et al,.

Nisur nga ngjarjet e fundit të ndodhura në shoqërinë shqiptare por edhe shqetësimeve të vazhdueshme të prindërve dhe mësuesve në shkollat nëntëvjeçare, u nxit projekti i Qendres URA, në trajtën e një studimi, për të analizuar gjendjen aktuale të ambientit online. Analiza u krye në formën e anketës anonime online, ku nxënës (klasat I-IX), prindër, mësues dhe psikologë iu përgjigjën me një vullnet që rrallë e kishim hasur në të kaluarën në plotësim anketash. Në vetëm dy ditë, numri i anketave arriti në 2000, nga të cilat 932 u plotësuan nga prindër, 727 nga nxënës dhe pjesa tjetër mësues dhe psikologë. Metodologjia e përdorur është kërkimi në bazë të nevojave (design research).

Rezultatet e anketave ndihmojnë për të krijuar dhe zbatuar politika  të rëndësishme në arsimin fillor dhe nëntëvjeçar. Ato ravijëzojnë nevojën e shoqërisë sonë për qasje afatgjatë dhe të qëndrueshme të këtyre politikave zhvillimore, fokusuar kryesisht në edukim dhe bashkëpunim mes palëve. Edukim që e pranojnë të gjitha palët e anketuara, dhe bashkëpunim e vullnet që duket se e kërkojnë po ashtu të gjitha. Por, çfarë i ndalon këto katër grupe interesi thelbësore të bashkëpunojnë? Pyetje që duket se merr përgjigje sa më shumë të analizohen rezultatet.

Për t’i paraqitur rezultatet në formatin që e ‘detyron’ media informative po parashtrojmë fazat kryesore ku mund të kategorizohen pyetjet e mbyllura me po/jo si: procesi i njohjes, përjetimit, reagimi/pasojave lidhur me cyberbulling. Ndërsa pyetjet e hapura janë evidentuar më tej sipas përgjigjeve të marra në kategori. Në këtë artikull po parashtojmë vetëm rezultatet e nxënësve.

Për prindërit, mësuesit dhe psikologët do të kemi artikuj të ardhshëm, kjo për efekt hapësire informative.

1)  Njohja e nxënësve
68.5% e nxënësve të klasave I-IV nuk kanë dëgjuar ndonjëherë  fjalën "Cyberbulling"
42.3% e nxënësve të klasave I-IV nuk dinë çdo të thotë të ngacmosh dikë në internet

 

2) Përjetimi i nxënësve
58.2% e nxënësve të klasave V-IX nuk ndihen të sigurtë kur komunikojnë në internet.
23.2% e nxënësve të klasave V-IX kanë qenë dëshmitar të rasteve të cyberbullism
26.8% e nxënësve të klasava V-IX  deklarojnë se cyberbullism ndikon në marrëdhënie me shokët dhe në ecurinë në mësime.
10.3% e nxënësve të klasave V-IX pohojnë se dikush i ka bërë të ndjehen keq duke i shpërndarë diçka pa leje në internet

 

3) Reagimi/Pasoja e nxënësve
61.4% e nxënësve të klasave I-IV nuk dinë sesi të ndihmojnë një shok që ngacmohet online
69.3% e nxënësve mendojnë se ngacmimet në internet janë më të këqija se ato të jetës reale
57.7% e nxënësve të klasave I-IV nuk kanë mësuar në shkollë sesi të sillen në mënyrë të sigurt online.
53.1% e nxënësve të klasave V-IX   deklarojnë se nuk kanë ndërhyrë tek shoku në raste të situatave të cyberbullism
72% e nxënësve të klasave V-IX  nuk e kanë ndryshuar asnjëherë privatësinë për të shmangur problemet.
34.3% e nxënësve të klasave V-IX pohojnë se shkolla nuk ka bërë mjaftueshëm për të mësuar rreth cyberbullism.

Pyetje të hapura për nxënësit e klasave I-IV:

63% e nxënësve të klasave I-IV nuk dinë sesi të ndihmojnë një shok nëse ai ngacmohet online.

Pjesa tjetër që i është përgjigjur me Po, shkruan si më poshtë.

Referenca

[1] dictionary.cambridge.org

[2] Smith, P. K., Mahdavi, J., Carvalho, M., Fisher, S., Russell, S., & Tippett, N. (2008). Cyberbullying: Its nature and impact in secondary school pupils. Journal of Child Psychology and Psychiatry, 49(4), 376–385.

[3] Vogels, E. A. (2022). Teens and cyberbullying: 2022. Retrieved November 6, 2023, from https://www.pewresearch.org/internet/2022/12/15/ teens-and-cyberbullying-2022/

[4] Kowalski, R. M., Giumetti, G. W., Schroeder, A. N., & Lattanner, M. R. (2014). Bullying in the digital age: A critical review and meta‐analysis of cyberbullying research among youth. Psychological Bulletin, 140(4), 1073–1137.