Meta nis bisedimet me palët, zgjedhjet lokale 2019 në 23 ose 30 qershor

TIRANË- Presidenti Ilir Meta ka zhvilluar ditën e sotme një takim me palët politike për përcaktimin e një date për zgjedhjet e ardhshme lokale.

Pas Ballës dhe Spahos, Presidencën e vizitoi edhe nënkryetari i Lëvizjes Socialiste për Integrim, Luan Rama, i cili në një prononcim për mediat u shpreh se data e tyre nuk ishte problem por problemi për të qëndon tek ndërhyrja e grupeve kriminale në votë.

Unë ndava shqetësimin e LSI-së se problemi i zgjedhjeve në Shqipëri nuk është data, por pastrimi i zgjedhjeve nga interferenca dhe lobimi nga grupet kriminale. Problem ka qenë dhe blerja e zgjedhjeve dhe ka qenë në kolaps. Ky vend i mbytur nga informaliteti nuk ka nevojë për zgjedhje formale, por për zgjedhje reale që të shprehen vullnetin qytetar dhe jo kriminal. 

Luan Rama, nënkryetar i LSI-së

Kryetari i grupit parlamentar të Partisë Socialiste, Taulant Balla, ka zbuluar ditën e sotme pas takimit që pati me Presidentin Meta, se dy datat më të mundshme të zhvillimit të zgjedhjeve lokale të vitit 2019. Balla tha se dy datat janë dy të dielat e fundit të qershorit 2019, që janë 23 dhe 30 qershor.

Duke falenderuar presidentin e Republikës, për vijimësinë e një tradite shumë-vjeçare për dekretimin e datës së zgjedhjeve, zhvilluam një bisedë me presidentin Meta. Kodi Zgjedhor është i qartë, për përcaktimin që në sezonin zgjedhor prill maj-qershor, është cituar, 2 të dielat e fundit të qershorit si dy datat e mundshme të zhvillimit të zgjedhjeve vendore. Ka patur nga operatorët turistikë një datë më të hershme nga fundi i qershorit, por kjo është një çështje, që arrihet me dakordësi. S’kemi biseduar me opozitën.

Taulant Balla, kryetar i grupit parlamentar të PS