Rreth 40 mijë maturantët që do ti nënshtrohen maturës shtetërore do te kenë mundësi të aplikojnë për të ndjekur studimet e larta në datën 17 korrik. Aplikimi për në shkollën e lartë do të ketë 2 raunde dhe disa faza.

Ndërsa Ministria e Arsimit ka lëshuar një urdhër për datën e provimit për lëndët me zgjedhje. Për shkak se zgjedhjet do të mbahen në datën 25 qershor, provimi i maturës do të afrohet një ditë, dhe nga data 24 ai do të zhvillohet në datën 23 qershor. 

Rezana Vrapi, drejtore e Qendrës së Shërbimeve Arsimore, sqaroi edhe udhëzimin e dalë për zbatimin e raundit të parë dhe të dytë, si edhe fazave përkatëse. 
 
"Pas përpunimit të të gjitha të dhënave dhe dërgimit të tyre në Qendrën e Shërbimeve Arsimore, Universitetet do të bëjnë shpalljen e këtyre fituesve që do të jetë data 28 gusht.

Me 29 gusht ne do të shpallim procesin e regjistrimit. Raundi i parë do të zgjasë 14 ditë dhe do të ketë 7 faza, ku secila fazë do të zgjasë 48 orë dhe brenda këtyre fazave secili aplikant ka të drejtë të shkojë të regjistrohet pasi ai ka parë në portal pozicionin e  tij.

Dhe shikon që është me ngjyrën jeshil, është shpallur fitues duhet që brenda 48 orëve të bëjë regjistrimin pranë sekretarive mësimore, nëse e tejkalon 48-orëshin e humbet të drejtën për t'u regjistruar në atë program studimi", sqaroi ajo.
 
Ndërkohë që raundi i dytë do të ketë një afat më të shkurtër kohor dhe në 16 tetor shkollat janë gati të fillojnë vitin akademik.
 
"Raundi i dytë do të fillojë në një afat kohor shumë të shkurtër, pra nëse me datën 11 shtator mbaron raundi i parë me 15 shtator fillon raundi i dytë i aplikimeve i cili është thuajse i ngjashëm më raundin e parë. Pra do të ketë një sasi ditësh për të aplikuar dhe menjëherë pas shpalljes së rezultateve do të fillojë regjistrimi", tha Vrapi.

Redaksia Online
Al.N/Shqiptarja.com