Derbi për Myrto Uzunin, Sevilla ofertë për yllin e Kombëtares

Myrto Uzuni është dëshirë e Sevillas në La Liga. Sulmuesi anësor i Granadas lidhet me një kalim në "Sanchez Pizjuan", teksa "Elmira.es" bën me dije se andaluzët janë në garë dhe kanë paraqitur ofertën për beratasin.

27-vjeçari këtë sezon ka qenë titullar dhe në 26 ndeshje ka shënuar shtatë gola. 9 milionë euro është vlera e tij në treg, por situata jo e mirë e Granadas dhe një rënie e mundshme e tyre në La Liga 2 mund të ulë ndjeshëm çmimin e Uzunit.

Me kontratë deri në verën e 2026, duket se Uzuni në verë do qëndrojë në La Liga pasi edhe Betis, rivali i Sevillas në qytet kërkon t'i prishë punë për shqiptarin.

Myrto Uzuni, një nga yjet e mëdhenj të Granada  

Sezonin e kaluar, Myrto Uzuni shkroi disa shifra spektakolare për Granada për të arritur ngjitjen e shumëpritur në La Liga. Në 38 ndeshje në kategorinë e dytë të futbollit spanjoll, sulmuesi shqiptar arriti të shënojë 23 gola dhe të shpërndajë pesë asistime, shifra këto të yjeve.

Këtë sezon, pavarësisht paraqitjes së dobët të Granada në La Liga, Myrto Uzuni ka arritur të shënojë shtatë gola në më pak se 2000 minuta të luajtura. Sulmuesi shqiptar është një nga gjërat e pakta që mund të shpëtohet në një sezon për t'u harruar në stadiumin 'Nuevo los Cármenes'.

Shumë klube janë në garë për Myrto Uzunin, ndaj Sevilla nuk do ta ketë të lehtë transferimin e sulmuesit shqiptar. Ndër skuadrat e interesuara spikat Real Betis, ndaj mund të ketë një 'luftë' mes dy skuadrave të qytetit për nënshkrimin e sulmuesit aktual të Granada.

Në pozitën e parafundit, Granada ndodhet dhjetë pikë larg zonës së shpëtimit dhe rrëzimi në La Liga 2 do bënte që Uzuni të mendonte të ardhmen mes shumë variantesh.

S.DH/Shqiptarja.com

TAG:
• Granada
• la liga
• Legjionaret
• Myrto Uzuni