Si Homeri, të cilin e bën pjesë të tablove të tij në vaj, Orion Shima, e ndërton udhëtimin e Odisesë së tij, përmes spatulës e penelit... Fton në fabulën e tij piktoreske që vizitorët në galerinë “Fab” deri në 16 mars të udhëtojnë “Deteve ngjyrë vere”...
“Është një lloj udhëtimi i gjithë mitologjisë greke në veçanti e atyre që qarkullojnë në Mesdhe”, shprehet artisti Orion Shima.
29 tablo, ku subjektet siç orienton kuratori Parid Teferiçi i zgjedh nga sojlinjtë e Kadmusit e të Harmonisë, çiftit që la Tebën me historikun e mbartur të fatkeqësive familjare, e që më pas pëson metamorfozën... Por këta aktorë të përzgjedhur, prej kësaj historie, sjellin figura që s’dinë ta çmojnë kohën në Olimp, e si pasojë humbasin në gjera të pavlera...
“Është një ekspozitë që përpiqet të artikulojë harenë, dhimbjen, të gjithë kulturën e asaj kohe, por duke e sjellë në një formë më bashkëkohore dhe sigurisht edhe në bazë të ndjesive të mia personale”, shprehet më tej piktori.
Herë si mjellmë e herë si tjetërkafsh, shfaqet Zeusi në pasionet e veta, më tej Edipi para Sfinksit, e si pasojë në përmbushje të fatit të tij tragjik, siç ia dikton Orakulli i Delfëve... apo Zeusi i zemëruar me Marsian, që guxoi ta sfidojë si zot të muzikës...
“Kësaj here ka qenë një kërkim paraprak i përzgjedhjes së çdo fabule, dhe në vartësi të gjendjes që krijon vetë fabula, krijohet pastaj gama koloristike, tensioni, hareja, lumturia. Të gjitha këto pastaj marrin edhe një spunto, që çlirohen nga pikëpamja e ekzekutimit artistik”, shprehet më tej Shima.
Teferiçi thotë se udhëtimi i Shimës mbërrin tek “Metamorfozat” e Ovidit, pa lënë mënjanë Homerin, ndërkaq vizitori mund të reflektojë, përmes portretizimit të mitologjisë në aktualitet, në një garë ndoshta të egër edhe në art, për ikjen, tragjizmin edhe në bërthamën e shoqërisë, humbjen e kohës në një det kotësie, apo më keq, vesesh e shthurje.
“Rimarrja e temave të tilla, që janë sa historike dhe të ndërtuara nga Historia e Artit, herë pas here, krijon edhe vetë një mundësi që ti ta rishikosh dhe ta transformosh fabulën... ta risjellësh në kohën tënde, me mjetet dhe artikulimet që i përkasin kohës që ti jeton”, tregon Shima.
Lajme të tjera
-
‘ARKETIP’, rrugët e memories ‘të trupëzuara’ në 25 veprat e artistit Viktor Ferraj
22 Mars 2023, 15:25
-
‘Ballo me maska’, 43 piktura të Ilir Balës ekspozohen në ‘Fab’, artisti: U inspirova nga njerëzit e zakonshëm
11 Janar 2023, 17:00
-
Me aureolë e të pagëzuar si shenjtorë, të vobektët në Galeri përmes 20 tablove, Gazmend Leka i kundërvihet shpërfilljes së mjerimit
30 Nëntor 2022, 15:19
-
Mban ‘pezull’ kohën e thërret njerëzit e dashur në 24 tablo, Peqini: Si e realizova shtatoren e Bogdanit 5 m të lartë në Krumë të Hasit
19 Maj 2022, 20:52
-
Orion Shima ‘i kundërvihet’ indiferencës ndaj natyrës, ekspozita “Kjo vjeshtë”, në një triptik me 19 vepra të punuara në pandemi
21 Mars 2022, 16:59
-
Nga pengesat në diktaturë tek momentet e vështira me prindërit, i biri i Edi dhe Mihal Luarasit me “Rrëfime” në FAB, Eldoni: Si e realizova portretin e nënës
3 Shkurt 2022, 19:59
-
Ekspozita/Raporti i njeriut me natyrën në veprat e Shimës dhe Stommel-it
14 Tetor 2020, 16:29
-
Në “Kopshtin e mbyllur” të Orion Shimës, aty ku bashkëjetojnë bukuria femërore dhe natyra
18 Shkurt 2020, 16:07
