Dhunë në Kosovë, parlamenti në
sallë të improvizuar, 10 në pranga

Pas orëve të gjata tensioni, përplasje në Kuvend dhe jashtë tij, sharje dhe ofendime mes deputetëve dhe dhunës me sende të fortë, ku nuk kanë munguar shishet e ujit ka përfunduar seanca e Kuvendit të Kosovës e cila u mbajt në një sallë të improvizuar brenda ambienteve.
 
Seanca rifilloi pak para mesnatës dhe përfundoi rreth orës 01:45 të ditës së shtunë. Gjatë kësaj kohe, seanca u ndërpre dy herë.
 
Deputetët e pozitës miratuan me shpejtësi të gjitha projektligjet e rendit të ditës, ndërsa opozita nuk mori pjesë, pasi tre heë më parë ndërprenë seancën me gaz lotsjellës.
 
Megjithatë opozita në Kosovë e ka cilësuar si të jashtëligjshme seancën duke deklaruar se nuk do ta njohë dhe se do të vazhdojë sërish me planin e protestave.
 
Kreu u VV-së, Visar Ymeri deklaroi se policia nuk i ka lejuar deputetët e opozitës që të marrin pjesë në seacën e improvizuar në sallën brenda godinës së Kuvendit.

Sipas Rregullores së Kuvendit të Kosovës, neni 3 dhe neni 4, lejon që mbledhja të mbahet edhe jashtë selisë së Kuvendit
 

Komunikata e policisë së Kosovës:

Njësitet policore gjatë veprimeve të tyre kanë arrestuar dhjetë protestues të dhunshëm, të cilët janë shoqëruar në stacion policor për intervistim dhe procedura të mëtutjeshme ligjore.

Po ashtu si pasojë e dhunës së shprehur nga disa protestues është lënduar një zyrtar policor, i cili ka kërkuar ndihmë mjekësore.

Policia e Kosovës ka arritur ta vërë situatën nën kontrolle dhe sot ajo konsiderohet të jetë e qetë dhe stabile.

Mbrëmë pas mesnate seanca është zhvilluar në një ambient tjetër të objektit të Kuvendit, ku, pa praninë e deputetëve të opozitës, që kishin mbetur në sallën e mbledhjeve, ka shqyrtuar e miratuar projektligje e vendime sipas rendit të ditës.

Redaksia Online