Shkrumbohet gjatë natës makina e gjyqtarit të Shkodrës Andri Ymeri, dy persona i vunë flakën dhe u larguan (VIDEO)

Gjyqtari Andri Ymeri është marrë në pyetje prej orës 08:15 të mëngjesit të sotëm. Në një dalje për mediat ai ka deklaruar se askush nuk mund t'i bëjë presion për punën e tij.

"Gjyqtari duhet të jetë i përgatitur për çdo gjë. Nëse kam qenë unë objektivi, ta harrojnë se mund të më bëjnë presion për punën time. Nëse kam qenë unë objektivi për shkak të detyrës kam qenë. Ato që kam pasur për të thënë i kam thënë".

Jeni i shqetësuar?

Jam shumë i kënaqur, po si nuk qenkam i shqetësuar çfarë janë këto.

Policia e Shkodrës ka dhënë detaje nga ngjarja e ndodhur një natë më parë, ku u dogj qëllimisht makina e gjyqtarit të Shkodrës Andri Ymeri.

"Më datë 24.11.2019, rreth orës  23.20, në lagjen "Vasil Shanto", Shkodër, në rrethana ende të paqarta  ka rënë zjarr  në dy mjete të parkuara tip Volksëagen në pronësi të shtetasit A. T. 50 vjeç, dhe në mjetin   Mercedez-Benz, në pronësi të shtetasit A. Y. 40 vjeç, me detyrë Gjyqtar pranë Gjykatës Shkallës së parë Shkodër.

Si pasojë mjeti në pronësi të shtetasit A.T është djegur pjesërisht ndërsa mjeti në pronësi të shtetasit A.Y është djegur plotësisht.

Në lidhje me ngjarjen është ngritur një grup i posaçëm hetimor nën drejtimin e Prokurorisë së Rrethit Gjyqësor Shkodër,, ku vijon punën për mbledhjen e provave me qëllim identifikimin dhe kapjen e autorëve pasi paraprakisht dyshohet si ngjarje e qëllimshme", njofton policia.