Drejtoria e Përgjithshme e Arkivave të Republikës së Shqipërisë dhe Drejtoria e Përgjithshme e Arkivave të Kryeministrisë të Republikës së Turqisë nënshkruan një Memorandum Mirëkuptimi për dixhitalizimin e dokumentave të periudhes osmane qe ruhen në Arkivin Qëndror Shtetëror të Republikës së Shqipërisë.

Drejtoria e Përgjithshme e Arkivave të Turqisë do të sigurojë mjetet me të cilat do të kryhet dixhitalizimi. Në takimin mes dy Drejtorëve të Përgjithshëm Ardit Bido dhe Ugur Unal u tha se vendet tona kanë një histori të përbashkët që tregon bashkëjetesën tonë ndër shekuj.

Kreu i arkivës Ardit Bido falenderoi për mbështetjen dhe ndihmën që ofron Drejtoria e Përgjithshme e Arkivave të Kryeministrisë të Republikës së Turqisë në konsolidimin e kësaj pasurie të përbashkët, duke bërë të mundur Dixhitalizimin e Dokumentave Osmane që ndodhen në Drejtorinë e Përgjithshme të Arkivave, një kopje e të cilave do t'i vihet në dispozicion Drejtorisë së Përgjithshme të Arkivave të Republikës së Turqisë.

Promovimi i këtyre dokumentave të dixhitalizuara do t'i bëjë ato lehtësisht të aksesueshme jo vetëm për studiuesit, por dhe për publikun e gjerë, duke i kthyer institucionet tona në mjedise më tërheqëse. Ugur Unal tha se është e rëndësishme që midis dy vendeve ka një bashkëpunim të dyanshëm, dhe më e rëndësishmja është projekti që do të fillojë tani.
 
Redaksia Online
Al.N/Shqiptarja.com