Kryetari i Partisë Bashkimi për të Drejtat e Njeriut, deputeti Vangjel Dule, është shprehur kundër draftit të PS për reformën territoriale.

Gjatë fjalës në Kuvend Dule tha se diskutimet për 'Territorialen' i dhanë një mësim opozitës, që me mazhorancën nuk mund të bashkëpunohet kurrë në interes të Shqipërisë.

Duke iu drejtuar deputetëve të PS, Dule tha se ata votojnë vetëm sipas interesave të kryeministrit, pasi sipas tij, Edi Rama i shantazhon.

"Ishte një mësim që na dhatë edhe neve deputetëve të opozitës, një mësim i qartë, me ju nuk ka marrëveshje, nuk mund të ketë kontratë e bashkëpunim. Ju në çdo moment të aktivitetit tuaj qeveritar e parlamentar nuk keni parasysh interesa vendi, as tuajat, por interesat e të parit tuaj që ju shantazhon ditë e natë, që nëse nuk ndiqni politikat e tij, do ju kundërvihet juve dhe interesave tuaja.

Kemi një reformë me një rezultat tërësisht të dështuar. Në Komisionin e Posaçëm pyetjes sesi janë të dhënat demografike në bashkitë e vendit, shumica dërrmuese e kampit tuaj thonë se kemi një tkurrje drastike. Kjo provon dështimin. Ne i thellohemi së keqes. Ju asnjëherë s'keni pasur qëllim tjetër nga ai i kontrollit të territorit dhe përfaqësimit", tha mes të tjerash Dule.


Lajmi kryesor:

LIVE TV- ‘Territorialja’/ PD: Po asgjësoni 15 bashki pa konsultim! PS: Asnjë shërbim nuk largohet! ‘Pendohet’ Sinaj, Braçe kritika, qëndron në foltore përtej kohës: S'është reformë