Dy vite mungesë në Superligë, sot rikthehet derbi historik i Shqipërisë

SHKODËR- Vllaznia dhe Tirana do të përballen sot në ''Loro Boriçi'' javën e tretë të Superligës shqiptare. Kjo është përballja e parë mes dy skuadrave në Superligë pas një mungese 2- vjeçare.

Hera e fundit që u përballën këto dy skuadra ishte ajo e 27 majit të 2017. Njëra prej të dyjave duhet të shënonte ''njollën e zezë'' në historinë e saj, rënien nga kategoria. Barazimi 0-0 u mbyll me lotët tek kampi i Tiranës. Klubi më i trofeshëm në Shqipëri rrëzohej nga kategoria për herë të parë në histori dhe për këtë u bë shkas Vllaznia e cila i mbajti bardhebluve një barazim. 

Shkodranët në maj të 2017 menduan se kishin evituar ditën më të keqe në historinë e klubit të tyre, por një vit më vonë do të ishte radha e tyre. Vllaznia në 2018 e mbylli kampionatin mes rezultateve enigmë të kampionatit shqiptar. Bardhekuqtë fituan 5-1 në Korçë përballë Skënderbeut të cilët fitonin titullin e radhës por kjo nuk zbuti aspak tonet në kampion shkodran, Vllaznia për herë të parë në histori ishte rrëzuar. Po në këtë vit, 2018, Tirana do të kthehej bindshëm në Superligë, të njëjtën gjë e bëri edhe Vllaznia me lojtarët e saj të rinj sezonin e kaluar.

Kurse sot dy skuadrat rikthehen në fushë përballë njëra- tjetrës pas një fitoreje dhe një barazimi, si të barabarta në çdo aspekt historik dhe statistikor, ëpr të rikthyer edhe një herë ndeshjen ikonë të futbollit shqiptar. 

Në orën 19:00 në stadiumin Loro Boriçi të Shkodrës luhet derbi i Shqipërisë Vllaznia- Tirana.

TAG:
• Tirane
• Vllaznia
• superliga