Mbështetja e liderëve të së djathtës ekstreme europiane nuk po i mjafton Viktor Orban për të përmbysur situatën elektorale në Hungari.

Në Budapest, gjatë të ashtuquajturës “Asambleja e Madhe Patriotike”, Orban u shfaq krah figurave të njohura si Marine Le Pen, Geert Wilders dhe Matteo Salvini. Ata e lavdëruan hapur, duke e quajtur “luan”, “hero të vërtetë” dhe një lider që “sheh aty ku të tjerët janë të verbër”.

Por, përtej simbolikës politike, pjesëmarrja ishte e ulët, rreth 2 mijë persona dhe, sipas analistëve, këto aktivitete shërbejnë më shumë si propagandë për bazën ekzistuese sesa për të fituar votues të rinj.

Pavarësisht këtyre daljeve publike, partia e tij Fidesz rezulton pas opozitës Tisza në sondazhe, në prag të zgjedhjeve parlamentare të 12 prillit.

Sipas ekspertëve, qeveria po përdor të gjitha burimet shtetërore për fushatë, një praktikë që konsiderohet problematike nga ana ligjore dhe demokratike.

Fushata e Orban është ndërtuar mbi retorikën “luftë apo paqe” dhe sulmet ndaj Bashkimit Europian dhe Ukrainës, por kjo nuk po mjafton për të mbuluar problemet e brendshme.

Një nga goditjet më të forta vjen nga skandalet e korrupsionit.

Në qendër është ish-guvernatori i bankës qendrore, Gyorgy Matolcsy, i cili akuzohet për përdorim të fondeve publike për luks personal ekstrem — përfshirë një banjo me ar dhe elementë luksi që janë kthyer në simbol të arrogancës së elitës në pushtet.

Në të njëjtën kohë, një tjetër skandal lidhet me një fabrikë baterish pranë Budapestit, ku dyshohet se janë shkelur rregullat mjedisore dhe janë ekspozuar punëtorët ndaj substancave toksike, ndërkohë që autoritetet nuk kanë ndërhyrë.

Këto raste kanë forcuar perceptimin e një elite që pasurohet në kurriz të qytetarëve.

Një tjetër pikë e ndjeshme është raporti me Rusinë.

Raportime të fundit tregojnë për kontakte të afërta mes zyrtarëve hungarezë dhe Moskës, madje edhe gjatë takimeve të BE-së. Kjo bie në kontrast me retorikën e Orban për “sovranitet kombëtar”.

Këto zhvillime kanë ngritur dyshime për ndikim rus në politikën hungareze, duke e bërë situatën edhe më delikate në prag zgjedhjesh.

Sipas analistëve, aktivitetet me liderë të djathtë europianë synojnë të paraqesin Orban si figurë globale, por ndikimi real mbetet i kufizuar.

Madje, për shumë qytetarë, këto shfaqje politike duken të shkëputura nga realiteti i përditshëm, i shoqëruar me skandale dhe probleme ekonomike.

Në këtë sfond, Orban hyn në zgjedhje në një nga momentet më të vështira të karrierës së tij politike.