Endrick Felipe Moreira de Sousa ose shkurt Endrick ka gjetur akordin dhe nga vera e 2024 (mbush 18 vjeç) do jetë pjesë e Real Madrid. Sulmuesi 16 vjeçari brazilian i Palmeiras është talenti që premton më shumë për të ardhmen, me presidentin e "Galaktikëve" që nuk është kursyer duke ofruar 72 milionë euro.
60 milionë euro do shkojnë në arkat e Palmeiras, teksa 12 milionë euro janë taksa. Kontrata e djaloshit të lindur në 21 korrik 2006 me ekipin brazilian është deri në 2025, teksa Real Madrid fiton kështu garën me shumë klube europiane që kishin synim afrimin e sulmuesit.
Eksperti i merkatos, Fabrizio Romano bën me dije se të gjitha palët kanë rënë dakord dhe presidenti madrilen Florentino Perez dëshiron firmën paraprake deri në fundin e këtij muaji. Kësisoj Real Madrid afron në ekip një nga talentet më të mëdha të futbollit brazilian.