Shumë fëmijë kanë frikë nga bluzat e bardha. Por ky nuk është rasti i fëmijëve të fshatit Nuaj në Malësinë e Krujës.
Ata janë të detyruar të bëjnë mësim çdo ditë në ambientet e qendrës shëndetësore pasi shkollën ua shembi tërmeti.
Gazetari Julian Shotaj raporton se kati i parë i kësaj godine është përshtatur proivizorisht si shkollë për nxënësit e shkollës 9-vjeçare të fshatit Nuaj. Ndërsa kati i dytë shërben si qendër shëndetësore.
Ky vendim aspak normal është ndërmarrë nga Bashkia e Krujës! Në pamundësi të gjetjes së një ambienti të përshtatshëm, mësimi zhvillohet me turne pikërisht në të njëjtin vend ku vizitohen njerëzit e sëmurë.
Report Tv intervistoi drejtorin e Kujdesit Shëndetësor të Krujës, Redion Rroshi, i cili ka miratuar kërkesën e bashkisë për të futur nxënësit në qendrën shëndetësore të Cudhit.
"Ndër shkollat e shembura është edhe ajo e Cudhit dhe e vetmja mundësi dhe rrugë për t'u zhvilluar mësimi duke qenë se qendra shëndetësore ka hapësirën e mjaftueshme për t'ia mundësuar një kat të ndërtesës shkollës. Kemi menduar për t'ia ofruar si kat shërbimit të mësimit, duke parë si të pamundur mundësinë për zhvillimin e mësimit pasi jemi konsultuar me zyrën arsimore dhe me strukturat e tjera të pushtetit vendor, për pamundësi për t'u zhvilluar mësim online në Cudhi, sepse është terreni është shumë i vështirë. E vetmja mënyrë ishte që të zhvillonin mësimin në qendrën shëndetësore", thotë Rroshi.
I mohon rrezikun që mund tu kanoset fëmijëve nga Covid-19 apo viroza të tjera.
"Nxënësit e shkollës me maskë, personeli me maskë dhe normalisht nën monitorimin e personelit shëndetësor sikurse në çdo shkollë tjetër", deklaroi Rroshi.
Prindërit, jashtë kamerës thanë se ky është opsioni i vetëm për të shkolluar fëmijët, pasi në këtë zonë mungon interneti dhe nuk zhvillohet as mësim online.