Edhe Kryemadhi thirrje mësuesve si Meta: Të bëhemi të gjithë bashkë për fëmijët, ngrihuni!

Kryetarja e Lëvizjes Socialiste për Integrim, Monika Kryemadhi, njëjtë si bashkëshorti i saj, presidenti Ilir Meta, u ka bërë thirrje mësuesve të ngrihen për të ardhmen e fëmijëve, në këtë mision që sipas saj duhet të jënë të gjithë bashkë. Edhe presidenti Ilir Meta më herët në një urim për 7 marsin, tha se mësuesit janë në ballë të 'pranverës kuqezi', siç ai quan valën anti-qeveritare që mund të pasohet nga protesta të tjera pas tubimit të 2 marsit.

"Sot është dita e mësuesve të Shqipërisë, influencuesve më të rëndësishëm në edukimin e brezit të ri dhe formësimin e të ardhmes së kombit tonë. Ndërsa misioni i tyre i përditshëm shkon te edukimi i fëmijëve, zotimi im për të gjitha familjet shqiptare është kthimi i Shqipërisë në vendin ku mësuesi që ka në duar edukimin e brezave do jetë më i fortë dhe i respektuar, se ai që në duar ka pushtetin apo armët e krimit. 

Të dashur mësues, unë besoj te ju dhe misioni juaj! Sot duhet të bëhemi të gjithë bashkë për të ndihmuar fëmijët tanë. Ngrihuni, hiqni pluhurin nga vetja dhe filloni përsëri nga një perspektivë e freskët. Besoni te profesioni juaj dhe duajeni atë. Zgjoni pasionin që keni për lëndën tuaj ose për të mësuar dhe për të dhënë dije! 

Mençurojini dhe ndihmojini brezat të rriten me dashuri. Ngrihuni çdo ditë dhe bëni atë që bëni më mirë. Ju do të ndikoni te ata, që të bëhen më të mirë se sa e imagjinoni ndonjëherë. Mësojini fëmijët se ata nuk janë as “djaj “dhe as “engjëj”, ndoshta disa nuk janë aq shumë të zot dhe nuk shkëlqejnë, por ata janë e ardhmja jonë dhe meritojnë gjithë besimin dhe përkujdesjen tonë. 

Unë besoj te ju mësuesit e mi! Ju të heshturit gjer në dhimbje, të mëdhenjtë gjer në madhështi!  Gëzuar festën, ju të mirët mësues! Gëzuar nga mot!"

Lajmi kryesor:

politika uron 7 marsin/ Rama me fjalët e Konfucit! Meta nostalgjik, radhit mësuesit në ballë të 'Pranverës kuqezi'

G.M./Shqiptarja.com

TAG:
• 7 marsi