Trajneri i Teutës, Edlir Tetova, është përzgjedhur si trajneri i muajit tetor në kampionat shqiptar. Gjatë muajit që lam pas durrsaku regjistroi tri fitore në tri ndeshjet e zhvilluara, duke siguruar rezultate pozitive dhe duke u renditur në krye të kampionatit me 13 pikë.

Çmimi iu dorëzua trajnerit Tetova nga Drejtori Teknik i FSHF-së, Abdyl Kuriu, në ambientet e ‘Shtëpisë Futbollit’. Pas marjes së çmimit për federatën ai tha:

“Sigurisht që është një arritje për mua personalisht, por mbi të gjitha edhe për klubin. Pjesëmarrësit më të afërt janë stafi dhe lojtarët, sepse pa ta kjo nuk do të ishte e mundur. Kështu që dedikimi është për stafin dhe lojtarët,”- tha Tetova.

Ai theksoi gjithashtu se skuadra ka ende hapësirë për përmirësim, duke shprehur besimin se Teuta do të vijojë me paraqitje pozitive edhe në javët e ardhshme. Në përfundim, trajneri uroi që ekipi të ketë gjithnjë e më shumë tifozë në stadium, për ta mbështetur gjatë ndeshjeve të kampionatit.

“Mendoj që deri në këto momente kemi pasur paraqitje të mira. Pesë ndeshjet e para kanë qenë pozitive për klubin tonë. Mendoj që nuk jemi në 100% të potencialit tonë. Shpresoj që të kemi ecuri më të mirë në javët në vazhdim dhe, sigurisht, të kemi sa më shumë tifozë në vazhdim,”- përfundoi trajneri i Teutës, Edlir Tetova.

Ndeshja e radhës për Teutën do të jetë të shtunën në orën 18:30 kundër Skënderbeut.