Një ditë pas vdekjes tragjike të 27-vjeçarit Mark Prenga në një shtyllë elektrike në Rrilë, Prokuroria e Lezhës ka vënë nën hetim penal ndaj katër punonjësve të OSHEE-së.

Sipas Drejtorisë Vendore të Policisë Lezhë, hetimi ka nisur për veprat “Shkelja e rregullave të mbrojtjes në punë” dhe “Shpërdorimi i detyrës”. Nën hetim janë një inxhinier elektrik, 34 vjeç, dhe tre elektricistë të tjerë të OSHEE-së.

27-vjeçari humbi jetën të enjten në mëngjes, pasi dyshohet se ra në kontakt me rrymën elektrike gjatë riparimit të një defekti në një shtyllë pranë nënstacionit të Rrilës. Nga verifikimet paraprake dyshohet se nuk janë respektuar protokollet e sigurisë.

Materialet janë dërguar në Prokurorinë e Lezhës për veprime të mëtejshme.

Njoftimi i plotë i Drejtorisë Vendore të Policisë së Lezhës

" Në vijim të informacionit të dhënë dje, mbi humbjen e jetës së shtetasit M. P. (me detyrë elektricist i OShEE-së), dyshohet si pasojë e rënies në kontakt me rrymën elektrike, gjatë riparimit të një defekti, në një shtyllë në fshatin Rrilë, infomojmë se në vijim të veprimeve procedurale të kryera nga oficerët e Policisë Gjyqësore të Prokurorisë së Lezhës, nisi procedimi penal, për veprat “Shkelja e rregullave të mbrojtjes në punë” dhe “Shpërdorimi i detyrës”, për shtetasin M. L., 34 vjeç, me detyrë inxhinier elektrik i OShEE-së, si dhe për shtetasit K. Ll., 60 vjeç, A. Xh., 62 vjeç dhe E. R., 23 vjeç, me detyrë elektricistë të OShEE-së."