Ende pa kaluar Vettingun, anëtari i parë i Gjykatës Kushtetuese Besnik Muçi betohet para Presidentit Meta

Dy ditë më parë Presidenti i Republikës Ilir Meta vendosi që të dekretojë emërimin si anëtar të Gjykatës Kushtetuese të prokurorit, Besnik Muçi megjithëse ky i fundit nuk i ka mbyllur hesapet me vettingun.

Ndërkohë sot në Presidencë Besnik Muçi, bëri betimin para presidentit Ilir Meta. Në fund pas betimit Presidenti Meta i ka dorëzuar Muçit edhe dekretin e emërimit si anëtari i parë i gjykatës Kushtetuese.

Besnik Muçi, i cili ende nuk e ka kaluar vettingun megjithëse kaloi shkallën e parë, u ankimua nga  komisioneri publik  me argumentin se nuk justifikon pasurinë.

Nëse ankimimi i Komisionerit Publik do pranohet nga Kolegji i Posaçëm i Apelimit dhe Besnik Muçi do shkarkohet nga Vetingu, e gjithë procedura e ndjekur deri tani për emërimin e tij, bie. Dhe Gjykata Kushtetues mbetet prapë vetëm me një anëtar, shumë larg nga kuorumi minimal i nevojshëm prej 6 anëtarësh për të marrë vendime.

Njoftimi i Presidencës:

Në Institucionin e Presidentit të Republikës, në prani të përfaqësuesve të institucioneve të pavarura, ambasadorëve si dhe përfaqësuese të vendeve të Bashkimit Europian dhe të Shteteve të Bashkuara të Amerikës, u zhvillua sonte ceremonia e betimit para Presidentit të Republikës Sh.T.Z Ilir Meta, të anëtarit të parë të Gjykatës Kushtetuese, Gjyqtarit z.Besnik Muçi.

Pas ekzekutimit të himnit kombëtar dhe leximit të dekretit, Gjyqtari Muçi, duke vendosur dorën mbi Kushtetutën e Shqipërisë, u betua duke u zotuar se:

“Betohem se gjatë kryerjes së detyrave të mia do t'i qëndroj kurdoherë besnik Kushtetutës së Republikës të Shqipërisë!”

Presidenti Meta duke i dorëzuar Gjyqtarit Muçi dekretin e emërimit në këtë detyrë shumë të rëndësishme, i uroi suksese dhe punë të mbarë.

TAG:
• gjykata kushtetuese
• Ilir Meta
• Presidenti
• Besnik Muçi