Futbollistët shqiptarë ishin të rëndësishëm edhe këtë fundjavë në Europë. Në veçanti u dalluan Enea Mihaj në Portugali dhe Arbnor Muja në Turqi.
Enea Mihaj vazhdon të përmirësohet e padyshim është një alternativë e rëndësishme për trajnerin Sylvinho në Kombëtare, aq më tepër në mungesë të Ajetit. Mbrojtësi kuqezi u bë protagonist në Superligën e Portugalisë duke dhënë një asist me thembër.
Skuadra e tij, Famalikao u mund 1-2 në fushën e Vitoria Guimaraes, por Mihaj e bëri të vetën. Në minutën e 17-të, ai shërbeu për barazimin e përkohshëm 1-1. Ndërkaq, në Turqi, shpëthen një lojtar i kombëtares, që këtë herë është lënë jashtë, ashtu siç nuk u mor as në Europian.
![](https://shqiptarja.com/template/img/NO_ALFA_Kuadrate shqiptarja.png)
Ky është Arbnor Muja, që ka kaluar tek Samsunspori në Superligën turke dhe në ndeshjen e fundit ishte një hero i vërtetë. Samsunspori fitoi 5-0 në stadiumin e Hataysporit dhe futbollisti ofensiv i krahut realizoi golin e parë në minutën e 37-të.
Pas pushimit, ai e bëri më të sigurt suksesin duke dhënë pasimin për golin e dytë shënuar nga Marius.
Po në Turqi ishin përballë dy lojtarë të kombëtares. Ernest Muçi i Besiktas dhe Rey Manaj i Sivassporit luajtën si titullarë, teksa skuadra e Stambollit fitoi 2-0 me gola të shënuar nga Ciro Imobile me penallti në pjesën e parë dhe Gedson Fernandes në minutën e parafundit.
Muçi luajti 62 minuta, ndërsa Manaj deri në fund, e në fushë ishte edhe sulmuesi i Kosovës, Milot Rashica.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)