Enver Hoxha lidhje me UDB-në
spiunim me anë të librit “Titistët”

TIRANE- Në librin e tij me kujtime “Fadil Hoxha në vetën e parë” ky i fundit ngulmon se në fillim të tetorit, pasi e ftoi Gjoka Pajkoviçi t’i vinte në zyrë, shkoi menjëherë. Aty gjeti edhe Spasoje Gjakoviçi. Gjoka në thelb i komunikoi këto fjalë: “Fadil, Spasoja ka marrë një farë telegrami nga Tirana, në të cilin thuhet se shokut Enver Hoxha i je ankuar për gjendjen në Kosovë dhe Metohi”.

Fadil Hoxha tregon më pas se e kundërshtoi këtë akuzë si të pavërtetë. Në fund pati shqiptuar: “Nga kushdo që ka arritur ai telegram, nuk mund të ketë vërejtje, biseda ka qenë e hapur e informuese dhe shoqërore. Bisedë të ngjashme, por më të shkurtër kam pasur edhe me Koçi Xoxen, Mehmet Shehun dhe Kristo Themelkon në drekat dhe darkat, të cilat na i shtruan. Ata hollësisht më kanë njoftuar për gjendjen në Shqipëri. Të gjitha ato takime kanë qenë miqësore, ndërsa bisedat të hapura”.