'Është liruar Konstandin Xhuvani', Report Tv zbulon të vërtetën pas postimit të Berishës

TIRANË- Ish-kryeministri i Shqipërisë, Sali Berisha në Facebook ka postuar denoncimin e një qytetari, i cili pretendon se ka parë në QSUT, vrasësin e 5 personave, Konstandin Xhuvanin. 

Sipas qytetarit, Xhuvani nuk është më në burg, pasi para dy javësh ka qënë në QSUT, ku edhe është bërë operim nga apendisiti dhe më pas është marrë nga familjarët brenda ditës. 

Postimi i plotë i Berishës:

Pas postimit të Berishës, Report Tv ka kontaktuar me Drejtorinë e Përgjithshme të Burgjeve, të cilët kanë konfirmuar ndërhyrjen kirurgjikale të Xhuvanit por janë shprehur se ai aktualisht ndodhet i hospitalizuar në IVSHB (Spitali i Burgut) dhe më pas përmirësimin e gjendjes shëndetësore do të transportohet drejt burgut të Fushkrujës. 

Pak pas prononcimit për Report Tv, me anë të një deklarate për shtyp Drejtoria e Burgjeve ka dhënë edhe detaje për rastin e të burgosurit Xhuvani duke përgënjeshtruar lajmin për lirimin e tij.  

Deklarata e plotë e Drejtorisë së Përgjithshme të Burgjeve:

Të nderuar përfaqësues të Medias së shkruar dhe vizive,

Nisur nga një lajm krejtësisht i pavërtetë i përhapur në disa portale të disa mediave në vend, pa asnjë konfirmim zyrtar nga Drejtoria e Përgjithshme e Burgjeve, që pretendonte për lirimin e të dënuarit Kostandin Gjergj Xhuvani, sqarojmë sa më poshtë vijon:

Kostandin Gjergj Xhuvani i datëlindjes 24.06.1989, lindur dhe banues në Tiranë, është dënuar më 35 vjet burgim me vendimin Nr.670 datë 10.03.2015 të Gjykatës së Rrethit Gjyqësor Tiranë.

Nga dënimi i dhënë i mbeten për të vuajtur edhe 30 vjet 7 muaj 29 ditë burgim, për kryerjen e veprave penale “Vrasje në Rrethana Cilësuese” dhe “Armëmbajtje pa Leje” parashikuar nga nenet 79/dh dhe 278/5 të Kodit Penal të Republikës së Shqipërisë, dënim të cilin është duke e vuajtur në seksionin e sigurisë së lartë në IEVPenale Fushë Krujë.

Si çdo i dënuar tjetër, edhe të dënuarit Konstandin Xhuvani i garantohen të drejtat e përcaktuara në Ligjin Nr. 8328, datë 14.06.2018, “Për të drejtat dhe trajtimin e të dënuarve me burgim dhe të paraburgosurve” (i ndryshuar).

Thënë kjo, ju bëjmë me dije se në datën 30.10.2018 Kostandin Xhuvani është hospitalizuar ne IVSHB (Spitali i Burgut) për disa probleme shëndetësorë, me diagnozë Nodus hemoroidal, me kartelë klinike 407.

Në momentin e pranimit në Spital, pacienti paraqitej i zbehtë, ankonte për këputje trupore dhe dhimbje rektale. Menjëherë janë realizuar ekzaminimet dhe konsulta mjekësore me mjekun specialist proktolog të “ QSUT Nënë Tereza”, ku ka rezultuar me:

* Anemi(Hb 8mg/dl).

* Prolaps hemoroidal.

Në këto kushte, mjeku specialist ka kërkuar ekzaminimin mjekësor sigmoidoskopi. Në datën 04.11.2018, është realizuar ky ekzaminim dhe konsulta me mjekun specialist, ku është rekomanduar ndërhyrje kirurgjikale.

Në datën 05.11.2018 është realizuar ndërhyrja kirurgjikale në QSUT “Nënë Tereza”, i shoqëruar dhe nën mbikëqyrjen e Forcave Operacionale të Drejtorisë së Përgjithshme të Burgjeve.

Po në këtë datë, pas përfundimit të operacionit, pacienti Konstandin Xhuvani është rikthyer në IVSHB (Spitali i Burgut) për trajtim të mëtejshëm sipas rekomandimeve të mjekëve specialistë të QSUT “Nënë Tereza”.

Në ditët në vijim është konsultuar me mjekët specialistë (mjekun hematolog për problemin e anemisë) dhe është trajtuar në IVSHB (Spitali i Burgut) sipas rekomandimeve të tyre.

Aktualisht, ky i dënuar është i hospitalizuar në IVSHB (Spitali i Burgut), dhe me përmirësimin e gjendjes shëndetësore do të bëhet dalje nga IVSHB (Spitali i Burgut) drejt IEVP Fushkrujë.

Në vitin 2014, Konstandin Xhuvani u dënua me 35 vjet burg pasi më 4 nëntor të po atij viti vrau në lokalin e natës në rrugën e Elbasanit në kryeqytet shtetasit Enea Xhaja, Edison Jaho, italianin Gimapaolo Azzolo si dhe shokun e tij Arbër Demiraj.

TAG:
• sali berisha
• QSUT
• gjergj xhuvani
• konstandin xhuvani