Dy anëtarë të Force India janë larguar nga Bahreini, pas frikës nga ndonjë sulm eventual. Dhuna ka shpërthyer edhe në orët e hershme të së shtunës, në një fshat që gjendet jo shumë larg pistës së garës së F1, në Sakhir. Tetëmbëdhjetë persona janë lënduar gjatë përleshjeve me forca të sigurimit.
Dhuna në Bahrein ka shpërthyer që nga viti i kaluar. Protestuesit shiitë duan t'i japin fund regjimit Sunit. Nga shkaku i dhunës ishte anuluar gara e Formula 1 në vitin e kaluar. Krerët e F1 janë kritikuar ashpër që kanë vendosur të mbajnë garën në Bahrejn këtë edicion.
Shefi i Formula 1, Bernie Ecclestone, ka kritikuar gazetarët që ishin prezentë në konferencë për mediat. "Ju djema e pëlqeni një ngjarje të tillë. Ajo çfarë na duhet është një tërmet apo një gjë e tillë, për të pasur çfarë të shkruajmë. Ju e kërkoni një histori dhe është një e mirë. Kur nuk ka histori, atëherë e shpikni ndonjë", ka thënë Ecclestone.(rb/shqiptarja.com)
![](https://www.shqiptarja.com/template/img/sh_logo1.png)