Facebook drejt një miliard përdoruesve

Numri i përdoruesve të Facebook është duke kapur shifrën një miliard, duke shënuar një rritje me 33% në krahasim me vitin e kaluar. Shifra del nga bilanci i tremujorit të parë të këtij viti, ku numri i përdoruesve është 901 milionë. Vitin e kaluar në 31 mars, numri ishte 680 milionë.
Një tjetër shifër marramendëse është shkarkimi I fotove, 300 milionë foto në ditë hidhen në Facebook.

Ndërkohë që kompania e Marck Zuckerberg pritet të hyjë në bursë pas mesit të majit, shifra e fitimeve shënon rënie në krahasim me tremujorin e parë të 2011, këtë vit janë fituar 205 milionë dollarë, 12% më pak. Por xhiroja shënon një rritje me 45% për të njëjtën periudhë. Janë një milliard dollarë që kanë kaluar nëpër kontot e kompanisë vetëm në tre muajt e parë të 2012. Nga këto, 872 milionë vijnë nga reklamat, ndërsa 186 milionë nga pagesat e përdoruesve për aplikimet e ndryshme.
Duke bërë pjestimet, çdo përdorues i jep Zuckerbergut një fitim prej gati 5 USD.

Ulja e fitimeve vjen në fakt nga investimet që po bën kompania pikërisht në prag të daljes në bursë. Faceboook bleu Instagram për 1 miliardë dollarë, si edhe 650 patenta të ndryshme nga Microsoft për vlerën 550 milionë USD.

Përparime që vërtet të heqin mendjen ato të Facebook, mendoni, në vitin 2004 kishtë ‘vetëm’ një milion përdorues, tre vjet më vonë ky numër u 20-fishua. Tani, shumë shpejt, Zuckerberg mund të presë shiritin e një miliard përdoruesve.

Në botën e rrjeteve sociale, gjigandi tjetër që e ndjek Facebook-un hap pas hapi është Twitter, me 500 milionë përdorues.

(ep/shqiptarja.com)