Faik Ballanca, koha dhe
 antikoha e një krijuesi

Hyrja në fushën e letrave, nga mënyra sesi hyn në këtë tempull të lavdishëm, të mundimshëm e fisnik; mbetet një nga rrugët më interesante, më të vështira, me shumë të panjohura, ku në startin e saj zë fill dhe A-ja e jetëshkrimit të krijuesit. Kështu, duke ndjekur tipologjinë e shkrimtarëve të talentuar, ndalojmë tek këta të pakët, edhe më të pakët: tek fenomenet letrare.
Personalisht, këto të fundit, i kam quajtur të dinjitetshëm. Kështu në letërsi hyri Migjeni i Madh. Edhe pse erërat e ftohta e dëborërat shpesh me ngricë i janë vërsulur me tërbim shnjerëzor shëndetit dhe krijimtarisë së tij, ai e mbylli jetën duke qenë i lirë përmes faqeve të një libri të vetëm me një simbolikë vizionare, të cilën e quajti “Vargjet e lira”.