Faza përgatitore, Partizani fiton
miqësoren e fundit në Turqi

Partizani fiton edhe miqësoren e 3-të në Antalya ku mposhti me rezultatin tenistik 6-2 skuadrën e 21 vjeçarëve të Qabalas duke shfaqur një lojë bindëse. Pas suksesit 2-1 ndaj ekipit të parë të Qabalas disa ditë më parë, të kuqtë zhvilluan një tjetër test miqësor këtë herë ndaj talenteve të reja të skuadrës azere.

Trajneri Starova e nisi ndeshjen me disa ndryshime në formacion duke ulur në stol sulmuesit e momentit ganezin Ekuban i cili është i skualfikuar për shkak kartonësh dhe nuk do të luajë në ndeshjen e parë të fazës së tretë ndaj Luftëtarit në Gjirokastër.

Ndaj 21-vjeçarëve të Qabalas u aktivizua për herë të parë si titullar me Partizanin, malazezi Marko Cetkovic i afruar sëfundmi te të Kuqtë ndërsa që nga fillimi e nisën sfidën edhe Realdo Fili dhe Mentor Mazrekaj. I pari mund të zëvendësojë Ekuban-in në ndeshjen ndaj Luftëtarit ndërsa Mazrekaj ishte padiskutim lojtari më i mirë në fushë për skuadrën kryeqytetase në këtë miqësore pasi jo vetëm shënoi 2 gola por ishte frymëzuesi e pothuajse cdo aksioni sulmues të Kuqëve duke shfaqur një formë shumë të kënaqshme.

Partizanit iu deshën më pak se 2 minuta për të zhbllokuar shifrat. Ishte qëndërmbrojtësi Gëzim Krasiniqi ai që i dha epërsinë Partizanit , duke shfrytëzuar një top të mbetur në zonë pas një harkimi të Fejzullahit nga këndi. Në të 5-tën Partizani dyfishoi shifrat falë një supergoli të Mazrekajt. Në minutën e 9-t Idriz Batha e stampoi topin në traversë nëpërmjet një goditjeje standarte. Partizani nuk i frenoi sulmet drejt portës së 21-vjecarëve të Qabalas dhe në të 23-tën Mazrekaj shënoi edhe golin e dytë personal dhe të tretin për të Kuqtë.

Megjithatë Partizani nuk ishte aq i sigurtë në mbrojtje dhe 2 minuta më pas Rolan shkurtoi shifrat duke realizuar golin e parë të skuadrës azere. Festivali i golave me finalizimin e Atëndës në të 28-tën për ekipin e Starovës dhe Elvit për Qabalan, 11 minuta më pas. Në të 41-tën pas shumë përpjekjesh gjeti më në fund rrugën e rrjetës edhe Realdo Fili i cili shtyu drejt portës një top të kthyer nga portieri pas goditjes së Bathës. 

Me shifrat 5-2 përfundoi pjesa e parë ndërsa fraksioni i dytë nisi me dy ndryshime në formacionin e Partizanit, Atanda dhe Ramadani u larguan nga fusha për ti bërë vend në Ibrahimit dhe Trashit. Në të 59-tën ishte rradha e Boniface dhe portierit të ri Dajsinani për të hyrë në fushë. Pas shumë e shumë rastesh të krijuara Partizani shënoi edhe golin e 6-t në minutën e 88-të me sulmuesin e talentuar Jaupaj. Ky i fundit i aktivizuar nga stoli realizoi një tjetër gol të bukur që fiksoi shifrat përfundimtare të këtij takimi në 6-2.

dy.b/shqiptarja.com