Financat 10 mln € kredi nga BB për gratë në biznes, Denaj: Të luftojmë pabarazinë në paga

Ministrja e Financave dhe Ekonomisë, Anila Denaj ka nënshkruar në Vjenë, një marrëveshjen me Bankën Botërore për marrjen e një kredie në vlerën e 10 milionë euro për programin e barazisë gjinore dhe aksesin e grave në ekonomi. Denaj ka sqaruar sot në Samitin e Grave në Biznes se kjo do të ndihmojë femrat në aktivizimin më të madh në ekonomi.

“Janë 15.781 të regjistruara në 2019, dhe 5.089 ose 32% e tyre administrohen nga zonja. Një nga dy kontratat e kredisë të cilat do të ndihmojnë në veçanti ministrinë e Financave por edhe politikëbërjen për të rritur përfaqësimin e grave ndaj pronave dhe për të rritur zërin e saj vokal në kontekst të sipërmarrjes”, tha  Denaj.

Gjatë këtij samiti të organizuar nga Ministria e Diasporës, është  ngritur edhe shqetësimi i hendekut në paga që ekziston në vend mes burrave dhe grave.

“Unë besoj dhe në ato që kemi menaxhuar vitin e kaluar në raport me informalitetin dhe mbi të gjitha me luftën ndaj pagesës jo të pastër atë të informalitetit gri, mendoj 10.5% hendeku i pagave është jo e saktë dhe ne duhet ta luftojmë informalitetin por edhe pabarazinë gjinore”, u shpreh ministrja Denaj.

Ndërsa ministri Pandeli Majko theksoi se 28% e ndërmarrjeve të vogla e të mesme drejtohen nga femra.

“Janë afërsisht 252 milionë gra sipërmarrëse në mbarë botën, nga të cilat 153 milionë drejtojnë sipërmarrje të konsoliduar. Në Shqipëri ndërmarrjet e vogla dhe të mesme përbëjnë bazën e ekonomisë shqiptare dhe rreth 28% e tyre drejtohen nga femra”,  pohoi ministri Majko.

Pavarësisht të dhënave të përfaqësimit të femrave në ekonomi dhe jo vetëm, në Samit është rënë dakord që qeveria dhe instancat përkatëse të kontribuojnë në aktivizimin sa më shumë të grave në fusha ekonomike.

G.M./r.k./Shqiptarja.com

TAG:
• anila denaj
• Barazia gjinore
• pronave