Fitore të thellë shënoi Liverpool i cili mundësi në "Anfield Road" Hull City-n me rezultatin 5:1. Të kuqtë e Jurgen Klopp renditen në vendin e tretë me 14 pikë, 5 më pak se Manchester City kryesues.
Ndërkohë, edhe Manchester United vijon me rezultatet e mira në kampionat. Djajtë e kuq mundën 4:1 kampionët në fuqi, Leicester City. Të besuarit e Jose Mourinos e mbyllën takimin që në pjesën e parë, pasi arritën të shënon katër gola. Chris Smalling çeli serinë e golave në minutën e 22', Juan Mata dyfishoi shifrat në minutën e 37', goli i tretë do të vinte nga talenti 18-vjeçar Marcus Rashford në të 40'-ën, ndërsa "pokerin" do ta realizonte blerja e bujshme e merkatos së verës, Paul Pogba në minutën e 42' të pjesës së parë. Demarai Gray shënoi golin e vetëm për "dhelprat" e Ranierit. Manchester United mban vendin e 6-të në renditjen e Premier League me 12 pikë në 6 javë të luajtura.
Në Gjermani, Bayern Munchen shënon fitoren e pestë në po aq ndeshje të luajtura. Rekordmenët fituan sot në transfertë përballë Hamburg, me një gol në minutën e 90' të takimit. Joshua Kimmich gjeti rrugën e rrjetës 1 minutë nga fundi i takimit, duke i dhuruar 3-pikëshin bavarezëve. Në një tjetër fitore e shënuar në fundin e lojës është edhe ajo e Bayer Leverkusen në fushën e Mainz. Sulmuesi meksikan, Javier Hernandez, shënoi tripletë me golin e realizuar në minutën e 90' të takimit.
Pas javës së pestë, Bundesliga kryesohet nga Bayern Munchen me 15 pikë. Në vendin e dytë me 12 pikë janë nënkampionët e Gjermanisë, Borussia Dortmund, të cilët të premten mundën Fraiburgun me rezultatin 3:1.
Në Spanjë, Barcelona ka shënuar plot pesë gola në transfertën ndaj Sporting Gijon. Kampionët e La Liga-s, u rikthyen te fitorja pas 2 jave rezultatesh zhgënjyese ku kanë marrë vetëm një pikë. Ndaj modestëve të Gijon, serinë e golave e çeli i përhershmi Luis Suarez në minutën e 32' të takimit. Rafinha dyfishon shifrat në minutën e 74', ndërsa Neymar i çon shifrat në 0:3 në minutën e 81'. Në minutat e mbetura, katalanasit e gjejnë rrugën e rrjetës edhe dy herë të tjera. Arda Turan shënon golin e katërt në minutën e 84-ër, ndërsa "manita"-n e bën Neymar në minutën e 88-të të takimit. Pas kësaj fitorje, Barcelona renditet në vendin e parë me 13 pikë, po aq sa edhe Real Madrid, por madrilenët kanë një ndeshje më pak.
Redaksia Online
l.q/Shqiptarja.com