James Watson, bashkëzbulues i ADN-së, ka vdekur në moshën 97 vjeç. Vdekja e tij u konfirmua nga Laboratori Cold Spring Harbor në Long Island, ku ai punoi për shumë vite. Sipas New York Times, Watson vdiq këtë javë në një paliativ në Long Island.

Një biolog, gjenetist dhe biokimist amerikan, ai ndau Çmimin Nobel në vitin 1962 me Francis Crick  për zbulimet e tyre mbi strukturën e ADN-së. Ata e diskutuan për herë të parë zbulimin më 25 prill 1953, në një artikull në Nature që mund të konsiderohet si punimi më i famshëm shkencor në biologji dhe ndoshta në shkencë në tërësi.

Në vitin 2007, reputacioni i tij u njollos nga komentet rreth gjenetikës dhe racës, pasi gjatë një interviste tha se njerëzit me ngjyrë "nuk janë aq inteligjentë sa njerëzit e bardhë". Këto deklarata e çuan atë në përballjen me  probleme serioze financiare, nga të cilat ai u përpoq të rikuperohej  duke shitur medaljen e tij të Nobelit . 

Në atë kohë, Watson kërkoi falje, duke ia lënë përgjegjësinë e plotë për gafën gazetarit që e kishte intervistuar: "Ai shkroi se isha i shqetësuar për njerëzit në Afrikë për shkak të IQ-së së tyre të ulët... Diçka që nuk mund ta thuash." Ai shtoi se "ishte budallallëk nga ana ime", ndërsa përsëriti se deklarata e tij nuk duhet të merret si një deklaratë "konvencionale" raciste.

Në fakt, ai nuk ishte i panjohur për këto lloj polemikash. Në vitin 1997, ai argumentoi se një grua duhet të ketë të drejtën të abortojë nëse testet zbuluan se fëmija i saj ishte homoseksual.

Më vonë ai sugjeroi një lidhje midis ngjyrës së lëkurës dhe orientimit seksual, duke argumentuar se njerëzit me ngjyrë kanë një libido më të lartë se njerëzit e bardhë. Më pas pohoi se bukuria njerëzore mund të manipulohet gjenetikisht: "Njerëzit mendojnë se do të ishte e tmerrshme nëse do t'i bënim të gjitha vajzat të bukura, por unë mendoj se do të ishte e mrekullueshme."