Flamur Noka 'bekon' fotografimin e
votës, mbështet Këlliçin për FRPD?!

TIRANË - “Vota është e lirë dhe e fshehtë”! Kjo është një e drejtë themelore të cilën shqiptarët e kanë provuar në vite se nuk e “preferojnë”.  Është kthyer në një fenomen të shëmtuar tashmë që pas “shkundjes” së votës, madje me të dalë nga qendra e votimit, shqiptarët të “rrëfejnë” se për kë votuan e kujt force politike i besuan drejtimin e vendit. Disa e bëjnë këtë për interesa personale, për të pritur më tej përfitime politike që në rastet më abuzive vijnë pas vote për të cilën është paguar...

Të martën në Korçë, vota jo vetëm u tregua siç ndodh rëndom në vendin tonë mes rrethit të ngushtë, por edhe deklarua publikisht në rrjetin më të madh social Facebook, përmes një fotoje. Bëhet fjalë për zgjedhjet që po mban anëtarësia e Forumit Rinor të Partisë Demokratike për të zgjedhur kryetarin e ri mes tre kandidatëve, Belind Këlliçit, Ervin Salianjit dhe Oriela Nebiajt.

Vota e fotografuar i është besuar Këlliçit dhe mbështetësja në fjalë (emrin e së cilës po e ruajmë) kërkon që edhe vota e anëtarëve të tjerë të FRPD-së të shkojë për numrin 1, që në fletën e votimit i përket Belind Këlliçit.  



Por ndërsa komentuesit kanë shpërthyer në kritika për fotografimin e votës, si cenim të hapur të një procesi të lirë zgjedhor, surpriza ka ardhur nga ish-ministri i Brendshëm Flamur Noka, aktualisht deputet i Partisë Demokratike, i cili e ka “bekuar” këtë veprim.

Përmes llogarisë zyrtare në rrjetin social Facebook, deputeti i djathtë i ka bërë “like” – (pëlqej) postimit të simpatizantes së Këlliçit me votën e fotografuar.



Nuk duam të besojmë se ish-ministri ka ‘pëlqyer’ në këtë rast abuzimin me bërjen publike të votës, por edhe nëse do të ishte një “Like” në mbështetje të kandidatit Këlliçi – do të zihej ngushtë me liderin e të djathtë Lulzim Basha. Kjo pasi kreu i PD-së në një udhëzim të tijin ndalon ndikimin e funksionarëve të lartë demokratë në gazën zgjedhore për kryetarin e Forumit Rinor të Partisë Demokratike.

Redaksia Online
Shqiptarja.com