Fluks vizitash në spitalin e Durrësit
Mjekët: Sensibilizim për kancerin e gjirit

DURRES- Gjatë muajit tetor, falë edhe sensibilizimit mediatik, ka patur fluks vizitash në spitalin rajonal të Durrësit në Repartin e Mamografisë. Drejtoresha e këtij spitali, Ardiola Frashëri, thotë se kanë qenë gra të moshave të ndryshme të cilat i janë nënshtruar procesit të ekzaminimit të gjirit, duke e çuar deri më sot në 180 numrin e vizitave. Kreu i këtij institucioni sqaron gjithashtu se gjatë këtij muaji, reparti i mamografisë ka funksionuar nga mëngjesi deri në orën 22.00 të mbrëmjes duke përfshirë edhe ditët e shtuna, ku pasur ditë që kontrolleve u janë nënshtruar deri 30 gra, por fatmirësisht gjatë këtij muaji nuk është evidentuar asnjë rast pozitiv.

“Ka një rritje të ndërgjegjësimit të grave. Ne kemi një numër në rritje të ekzaminimeve si te arsimtaret, për të cilat jemi lidhur me drejtorinë arsimore të rajonit të Durrësit. Ka ditë që ka arritur deri në 30 mamografi në ditë. Kemi një numër afërsisht 180 mamografi nga fillimi i këtij muaji. Nga fillimi i tetorit nuk ka patur asnjë rast pozitiv”, tha Drejtoresha e Spitalit Rajonal Durrës, Ardiola Frashëri.
 
Ndërkohë gjatë këtij viti kanë kryer mamografi të gjirit 434 gra, prej të cilave 155 kanë rezultuar pozitive. Këto raste kanë qenë në fazën e dytë dhe të tretë të sëmundjes. Gjatë këtij viti do të mundësohet që në spitalin e Durrësit të kryhen edhe analizat e kancerit të gjirit dhe të qafës se mitrës që deri më sot kryhen në Tiranë.
 
Mjekët e spitalit thonë se mamografitë e gjirit duhet të kryhen gjatë gjithë vitit dhe jo më fushata, pasi sa më herët që të diagnostikohet sëmundja aq më lehtë mjekohet.
 
Redaksia online
(e.s/shqiptarja.com)